Nipahimangno ang City of Talisay Traffic Operations and Development Authority (CT-TODA) nga mobalik na sila sa ilang pag-clamp sa mga sakyanan nga ipataka sa pag-park.
Ang pagbalik sa clamping sugdan karong adlawa, Hunyo 9, 2022. Nahunong kini atol sa Covid-19 pandemic.
“Giawhag ang mga nanag-iya ug nagmaniho og mga sakyanan nga nakaparada daplin sa pangpubliko nga dan pagkuha sa inyong mga sakyanan,” pahibawo sa traffic body.
Ang tag-iya sa ma clamp nga sakyanan multahan og P1,000 subay sa ordinansa sa Siyudad, matod ni CT-TODA chief Jonathan Tumulak.
Kadtong motangtang sa clamp o mopadagan sa sakyanan bisan gi-clamp mag-atubang og kasong kriminal.
“Ang motangtang sa clamp ug ang mopugos sa pagpadagan sa sakyanan nga moresulta sa pagkaguba sa clamp mag-atubang og kasong kriminal, subay sa nalatid sa ordinansa,” dugang sa ahensiya.
Ang clamping sa mga sakyanan gitumong aron way makababag sa karsada, labina sa mga emerhensiya.
Usa sa mga suliran nga atubangon sa mga bombero matag dunay sunog mao ang kalisod sa agianan tungod sa gi-park nga mga sakyanan daplin sa dan, labina sa mga dapit nga sudlunon.
Ang mao nga suliran wa lang masinati sa Talisay, apil na sab sa ubang mga dapit sa Metro Cebu.