Maorag dili maayo ang 2021 sa showbiz tungod sa kadaghang nagbuwag ug daw nagkataas pa ang listahan sa pagsud sa 2022. Unsa kahay rason? Dili sila andam sa “commitment” o mao gyud ni ang showbiz? Adunahan lang sa tawhanong kalipay apan kabus sa espirituhanon nga kinabuhi? Nia ang pipila sa mga gipistahan karon sa mga “Marites.”
Carla Abellana ug Tom Rodriguez / GMA
Subo palandungon nga nilanat ra og tulo ka buwan ang kasal nilang Carla ug Tom nga nagbuwag tungod sa giingong “one night stand” sa aktor. Si Carla giingong desididong mopasaka og kasong annulment samtang si Tom nibahad nga ipagawas ang baho sa aktres. Apan duna na karoy “gag order” nga nagdili sa aktor nga motingog sa isyu.
Moira dela Torre ug Jason Hernandez / KASAL.COM FB
Giklaro sa usa ka post nga walay laing babaye si Jason ug dili sab ni bading. Ang giingon ni Jason nga “unfaithful” kay didto kuno ni og usa ka balay kahilayan. Giintriga sab sa mga netizen si Moira nga “cheater” nga gi-deny sa singer. Ang ilang wedding beach gipahigayon sa Boracay niadtong Enero 14, 2019.
Kylie Padilla ug Aljur Abrenica / COSMO.PH
Si Robin Padilla nitug-an nga third party ang rason sa break-up nila ni Kylie ug Aljur human sa duha katuig nga kaminyuon. Apan si Aljur nipasumbingay nga si Kylie ang unang nanglimbong ug dili siya. Si Aljur padayong na-link karon ni AJ Raval samtang si Kylie “dating” ang status. Duna silay duha ka mga anak nga nag-edad og 2 ug 4.
Michelle Madrigal ug Troy Woolfolk / INSTAGRAM
Gikumpirmar ni Michelle Madrigal nga divorced na sila sa iyang American husband. Sa latest vlog sa 33-anyos nga aktres niangkon ni nga dili sila compatible ug dili malipayon sa maong kaminyuon nga nilanat og duha ka tuig. Duna silay 4-anyos nga anak nga babaye.
Max Collins ug Pancho Magno / GMA
Maka-deny pa kaha si Max nga mismong ang iyang higalang si Kylie Padilla na ang nikumpirmar nga buwag na sila ni Pancho? “Parehas kaming ikinasal, parehas naghiwalay, parehas kaming nanganak,” matod pa ni Kylie sa interbyu. Sukad niadtong 2020 wala nay litrato si Max ug Pancho sa social media. Dihang nag-one year old ang ilang anak nag-iyahay sila og celebrate ug wa gani nila gi-tag ang usa’g usa.
Maxene Magalona ug Rob Mananquil / GMA
Gibadlong ni Maxene ang mga “Marites” nga nanguryuso sa iyang marital status. Birada pa sa aktres: “It’s better to spend your energy praying rather than gossiping.” Niadtong Enero pa gitangtang sa aktres ang apilyido sa iyang bana sa iyang Instagram, gipang-delete ang mga litrato ug gi-unfollow.
Janella Salvador ug Markus Paterson / ABS-CBN.COM
Bisan kon wa silay kumpirmasyon apan daw open secret na sa showbiz ang ilang break-up. Niadtong Hunyo 3 ang Fil-Brit singer-songwriter nagselebrar sa iyang 24th birthday nga wala ang aktres. Wala gani niya hisguti si Janella sa iyang thank you post. Duna silay anak nga mag-2 anyos pa lang.
Jake Cuenca ug Kylie Verzosa / INSTAGRAM
Duha ka mga anggulo ang gitan-aw sa break-up ni Jake ug Kylie human sa tulo katuig nga relasyon. Una, ang giingong “romansa” ni Jake sa usa ka sakup sa kongreso, ug ang ikaduha, ang grabeng love scenes ni Kylie ug Zanjoe Marudo sa pelikula nga matod pa wa makaya ni Jake.
Robert Bolick ug Aby Maraño / INSTAGRAM
Kontrobersiyal sab ang break-up sa PBA star Robert Bolick ug volleyball player Aby Maraño nga walo katuig nga uyab. Bisan ang pamilya ni Bolick ug ang teammates ni Aby nakurat kay ang ilang pagtuo sila pa ni Aby. Si Bolick ug ang Cebuanang si Cassandra Yu gikasal sa civil niadtong Marso 22 human sa pila lang ka buwan nga panag-ila.