Kapulisan sa Central Visayas (CV) nakasakmit og kapin sa usa ka libo nga armas ug nakasikop og kapin sa 200 ka mga tawo atol sa subsob nga pagpatuman sa Comelec gun ban sukad nagsugod ang election period niadtong Enero 9, 2022 nga natapos kagahapon, Hunyo 8,2022.
Una nang nihulagway ang Police Regional Office (PRO) 7, Armadong Kusog sa Pilipinas ug Commission on Elections (Comelec) nga malinawon ug hapsay ang national ug local elections sa Mayo 9, 2022.
Dunay gikataho nga lapad nga vote buying ug pagkalangay sa botasiyon tungod sa pagkadaot sa vote counting machines sa pipila ka mga lungsod sa rehiyon 7.
Sa datus nga gipagawas sa PRO 7, wala sila nakatala nga adunay armadong grupo nga naglihok atol sa election period gawas sa insidente sa usa ka election related incident sa Barangay Cabalayongan, lungsod sa Basay, Negros Oriental, diin gipusil ang usa ka kandidato pagka mayor sa maong lungsod.
Sukad nagsugod ang election period sa Enero 9 hangtod sa Hunyo 8, nakasakmit ang kapulisan og 1,254 ka loose firearms ug 265 ka mga tawo ang nadakpan nga nakalapas sa Comelec gun ban atol sa managlahing operation ug dungan nga Comelec checkpoints sa kapulisan ug militar.
Gipasigarbo ni Police Brigadier General Roque Eduardo Vega, hepe sa PRO 7, nga walay gideklarar nga failure of election sa tibuok rehiyon ilabi na sa mga dapit nga init ang dagan sa politika.
“PRO7 has achieved the objective of a no failure of elections through systematic security contingency preparations, public safety management, and crowd control,” matod ni Vega.
Gipasalamatan sa heneral ang mga Sugboanon lakip na ang katawhan sa tibuok rehiyon 7 nga ningsunod sa mga lagda sa Comelec alang sa malampuson ug hapsay nga piniliay niadtong Mayo 9, 2022.
Gidayeg usab niya ang tanang mga police personnel nga nisakripisyo sa ilang kaugalingon nga sulod sa pipila ka adlaw nga wala makakita sa ilang tagsa-tagsa ka pamilya tungod ug alang sa ilang pagserbisiyo sa katawhan aron luwas nga makabotar.
Bisan sa ilang ka busy sa pagpangandam sa siguridad sa election, wala usab nila biyai ang ilang kampanya batok kriminalidad ug illegal nga drugas.
Nakalusad sila og 1,975 ka police operations nga niresulta sa pagkasakmit sa 51,632.26 gramos nga gituohang shabu ug 55,333.40 gramos nga pinaugang marijuana nga mokantidad ang tanan og P357,739,376.
Nakatala usab sila og 2,706 nga nadakpan nga wanted persons sa 2,557 ka operations nga gilusad sa managlahing mga buhatan sa kapulisan sa CV.
Nakasikop usab sila og 5,323 ka mga tawo atol sa 2,180 ka anti illegal gambling operations ug pagkasakmit sa P500,000 nga kwarta gikan sa illegal nga sugal ug 2,180 ang napasakaan og kaso sa korte.
Saad ni Vega nga bisan natapos na ang election period magpadayon pa ang ilang subsub nga kampanya batok krimen.