Kapulisan sa probinsya sa Sugbo uyon sa panawagan ni outgoing President Rodrigo Duterte sa sunod nga administrasyon nga ipadayon ang gubat batok sa illegal nga drugas tungod kay dako kinig ikatampo sa pag-ubos sa kriminalidad tibuok Pilipinas.
Matod ni Police Colonel Engelbert Soriano, hepe sa Cebu Police Provincial Office (CPPO) nga sukad gisugdan ang kampanya sa kapulisan ug sa ubang ahensiya sa gobyerno nga batokan ang illegal nga drugas sa nasud, niubos og kapin sa katunga ang kriminalidad.
Kon itandi sa nanglabay nga katuigan sa wala pa mapili nga presidente si Duterte, taas ang mga kaso sa tulis, labina sa pagpatay ug uban pa.
Apan karon komportabli na ang mga tawo nga manggawas dala ang ilang mga mahalong butang kay alang kanila luwas sila.
“Kung makikita nyo ang indicator yung sa eight focus crimes, since yung nung war on drugs, talagang mahigit kalahati ang ibinaba nyan. Alam nyo naman makikita nyo naman siguro mas komportable ka ngayon maglakad sa kalsada. Wala ka na ngayon makikita na agaw cellphone. Wala yung mga petty theft o petty crimes, eliminated po ito. Ito yung mga after effect nung intensified campaign talaga,” matod ni Soriano.
Andam usab sila nga mohatag sa ilang tibuok suporta sa pamunoan ni President-elect Ferdinand Bongbong Marcos Jr. sama sa ilang gihatag nga suporta kang Duterte ug walay maka lubag niini.
Ang makabungog nga numero nga nakuha ni Marcos atol sa bag-o lang natapos nga piniliay nagpasabot nga mayoriya sa mga Pilipino misalig kaniya nga mangulo sa nasud nunot sa mga programa nga ipatuman niini, dugang sa opisiyal.