Gihatagan og dakong bili sa tibuok pwersa sa kapulisan sa Cebu Police Provincial Office ug Police Regional Office 7 ang kamatayon ni Police Staff Sergeant Careby-Clyde Alinsug, sakop sa Drug Enforcement Unit sa Consolacion Police Station nga napatay sa usa ka drug personality atol sa gihimo niining case build up niadtong Hunyo 5, 2022.
Matod pa ni Police Colonel Engelbert Soriano, hepe sa kapulisan sa lalawigan sa Sugbo, iyang giila si Alinsug nga maayong police ug wala siya makadungog nga aduna kini illegal nga kalihukan bisan asa gidestino sukad siya nasulod sa Philippine National Police sa 2012.
“Operatiba natin yung casualty at ang pagka tao po ng ating kasamahan ay talaga namang walang iniwan na negative na komento sa mga kasamahan niya at sa community kung saan siya nakatira, so malungkot po talaga yung insidente,” asoy ni Soriano.
Si Alinsug nasulod sa serbisyo niadtong Hulyo 2, 2012 ug nadestino sa Consolacion Police Station niadtong Nobiyembre 4, 2014 isip sakop sa alert patrol.
Nahimo usab siya nga assistant warrant and subpoena server pagka Agusto 31, 2018 ug nadestino sa municipal drug enforcement sa Pebrero 18, 2019.
Pagsulbong sa kaso sa Covid-19 sa Central Visayas, gi-detail siya sa Regional Health Service pagka Hunyo 9, 2020 sanglit usa man siya ka registered nurse ug natapos ang iyang assignment niadtong Oktubre 8, 2020 diin gibalik siya sa lungsod sa Consolacion nga maoy mother unit.
Mibisita usab si Police Regional Office 7 Director Police Brigadier General Roque Eduardo Vega sa haya ni Alinsug sa panimalay niini ug nitunol usab og hinabang sa pamilya lakip na ang pagta-od sa posthumous medal sa namatay.
Nasubo usab si Vega sa gidangatan sa iyang sakop apan wala kini magpasabot nga molugak na sila sa ilang kampanya batok sa illegal nga drugas.
Ang kamatayon ni Alinsug maoy nakadugang kadasig kanila sa pag gukod sa nga durugista sa Central Visayas, matod niya.
“Nakakalungkot ang araw na ito dahil isa sa aming hanay ang nawala. May mga anak ito at asawa na tiyak na mawawalay dahil wala na ang haligi ng pamilya. PSSg Careby-Clyde Valle Alinsug is a gallant police officer of PRO7.
“He dedicated his life to public service and the people he has worked with and is a responsible father to his family.
“Despite this regrettable loss of one of our police officers, PRO7 remains committed and dedicated to protecting the Sugbuanons from these lawless criminals,” matod ni Vega.
Samtang way nakitang lapses si Soriano atol sa case build up ni Alinsug uban sa usa ka kasaligan niining informant nga nakaila sa suspek nga si Reynaldo Ydil, alyas Tatskie, apan naunhan lang gyud kini nga niresulta sa iyang kamatayon.
Giila nila si Ydil nga notadong drug personality sa dakbayan sa Sugbo nga gawas sa iyang pagpayuhot sa illegal nga drugas, hitman usab kini sigun sa gilusad nga background check niini.