Si Cebu City Mayor Michael “Mike” Rama nibahad nga iyang susihon ang giingong mga anomaliya sa pagpanghatag og hinabang alang sa mga biktima sa Bagyong Odette (Rai) sa dakbayan sa Sugbo.
Sa pakighinabi sa mga tigbalita sa Miyerkules, Hunyo 8, 2022, gisubli ni Rama ang iyang pasidaan sa mga kawani sa gobyerno nga mawad-an sila og trabaho ug pasakaan sila og kaso sa higayon nga mapamatud-an nga apil sila sa maong mga kahiwian.
“That is also another thing that I have to be seriously looking into. Remember, I am not happy when I see an anomaly,” matod ni Rama.
“Those who have to leave, leave. Those who should be terminated, terminate. Those who cannot be renewed, should not be renewed. I mean business,” dugang niya.
Matud pa ni Rama nga walay indibidwal nga gikan sa mga inilang pamilya ang makapugong kaniya sa pagpaundang sa mga empleyado sa City Hall.
“No bloodline can tell me, I will be telling whoever and no sacred cow (makapugong nako). That is my directive,” matod ni Rama.
Ang mga taho nag-ingon nga pipila sa mga nalakip sa listahan sa mga benepisyaryo sa hinabang pinansyal namatay na.
Ang pangulo sa Department of Social Welfare and Services (DSWS)-Cebu City nga si Portia Basmayor niingon niadtong Martes, Hunyo 7, 2022, nga ilang gisusi ang isyu nga nitumaw sa Barangay Poblacion-Pardo.
Si Rama nipasidaan nga maghuwat og kaso ang mga barangay officials, Mayor’s Information and Liaison Officers, o DSWS personnel kon mapamatud-an nga sad-an sa mga anomaliya.
Una nang niluwat og memorandum ang mayor niadtong Mayo 16, nga nagtumbok nga tanang coterminous, casual, ug job order employees ubos sa executive department sa Cebu City Government i-evaluate sa Office of the Mayor.
Ang evaluation magdeterminar kon kinahanglan ba silang magpadayon sa pagtaho sa trabaho pagkahuman sa Hunyo 30, diin ang ilang mga kontrata matapos, kon dili ma-renew.
Ubos sa memo, ang mga empleyado paga-evaluate base sa mosunod: “kawatan, tapulan, hugawan, intregero, pala-away, walay nahibaw-an, dili mo bayad og utang, ug mo buko-buko.”