Ang Cebu City Government gikatakda nga mo-turn over sa duha ka medium-rise buildings (MRBs) ngadto sa dili mominos 200 ka mga pamilya nga napapahawa sa ilang dapit tungod sa flood control programs sa kagamhanan ug mga biktima sa mga miaging sunog.
Si Dante Arcilla Jr. sa Division for the Welfare of the Urban Poor (DWUP), nagkanayon niadtong Miyerkules, Hunyo 8, 2022, nga una nang giila ang 100 ka mga pamilya nga kandidato sa city’s socialized housing program.
Sumala ni Arcilla, ang duha ka MRBs sa Barangay Lorega-San Miguel i-turnover na sa Hulyo 29, 2022.
Ang MRBs gitukod sa Cebu Landmasters Inc. (CLI) isip kabahin sa pagtuman sa kompaniya sa gikanahanglan nga Balanced Housing Development Program ubos sa nalatid sa Urban Development and Housing Act of 1992.
Si Arcilla nagkanayon nga ang mga benepisaryo mobayad og P1,500 matag buwan lakip sa ilang utilities ug seguridad sa building, apan ang iyang buhatan nagproseso karon alang sa pagpaubos pa sa maong kantidad.
Ang desenyo sa programa maghatag og higayon sa mga benepisaryo sa pagpuyo sa tenement-style housing ngadto sa lima ka tuig aron dunay higayon ang pamilya nga makapangita og mas maayong lugar nga ilang kabalhinan.
Si Arcilla nipasidaan sa benepisaryo nga dili mopuyo sa MRBs ug ilang gipaabangan.
Si Mayor Michael “Mike” Rama niluwat og executive order (EO) nga ang MRBs gamiton para sa socialized housing projects, dili pangnegosyo sa benepisaryo.
Ang makalapas prisuhon ngadto sa unom ka tuig ug multa nga P150,000.