134 ka armas nasakmit sa election period

GIPRESENTAR: Si Police Colonel Ernesto Salvador Tagle, hepe sa Cebu City Police Office (CCPO), nipresen­tar sa mga armas ngadto kang Atty. Edwin Cadungog, ang Comelec election officer sa Cebu City North District, sa mga nasakmit nga armas atol sa election ban. / Arnold Y. Bustamante
GIPRESENTAR: Si Police Colonel Ernesto Salvador Tagle, hepe sa Cebu City Police Office (CCPO), nipresen­tar sa mga armas ngadto kang Atty. Edwin Cadungog, ang Comelec election officer sa Cebu City North District, sa mga nasakmit nga armas atol sa election ban. / Arnold Y. Bustamante

Nikabat sa 134 ka mga armas ang nasakmit Cebu City Police Office (CCPO) atol sa election period sukad sa Enero 9 hangtod Hunyo 8, 2022.

Gipresentar ni Police Colonel Ernesto Salvador Tagle, hepe sa CCPO, ngadto kang Atty. Edwin Cadungog, election officer sa Cebu City North District, ang mga nasakmit nga armas, diin ang uban niini boluntaryong gipangtahan sa mga tag-iya ug dunay expired ang lisesniya sulod sa election period.

Matod ni Police Lieutenant Colonel Janette Rafter, deputy director for operations sa CCPO, resulta kini sa ilang subsob nga kampanya sa pagpatuman sa Comelec gun ban.

Lakip sa ilang gihimo mao ang Oplan Katok diin kadtong mga lihitimong gun holder nga ni-expire na ang ilang mga lisensya gipangbisita aron itahan ang armas samtang giproseso pa ang papeles niini.

“Shown here are firearms, sagol na ni. Naa ni mga kaso and the rest of the firearms here were surrendered through our Oplan Katok,” matod ni Rafter.

Gipasalamatan sa Comelec ang kapulisan lakip na ang armadong kusog sa Pilipinas nga maoy adunay dakong papel sa malinawon, luwas ug hapsay nga piniliay niadtong Mayo 9, 2022 nga eleksiyon.

Matod ni Cadungog, ang subsob nga checkpoints ug pagsakmit sa mga armas lakip na ang pagkooperar sa katawhan hinungdan nga nakab-ot nila ang labing malinawon nga piniliay.

Gipasigarbo ni Cadungog nga walay election related incidents sa siyudad sa dihang padayon nga nangandam sila alang sa luwas nga eleksiyon.

“Nagpasalamat akog dako uyamot sa atong kapulisan ug sa atong miyembro sa armadong kusog sa nasod ingon man ang atong katawhan...” matod ni Cadungog.

Giangkon ni Cadungog nga aduna silay nadawat nga impormasiyon nga naay nahitabong pinalitay sa botos gikan sa mga kandidato apan walay bisan usa ang nireklamo sa ilang buhatan.

Nipasabot hinuon ang maong election official nga lisud mapamatud-an ang vote buying tungod kay kinahanglan nga masulod ang tanang mga elemento niini.

Gipahibawo usab niya nga halos tanang mga kandidato sa milabayng eleksiyon ang naka duso na sa ilang statement of contributions and expenditures (Soce).

DRUGA

Samtang niabot og kapin P160 milyunes nga balor sa illegal nga drugas ang nasakmit sa kapulisan sulod sa unom ka buwan.

Gipasigarbo saCCPO nga sugod Enero 9 hangtod Hunyo 8, 2022 , nakasakmit silag kapin sa 23 ka kilo sa gituohang shabu nga gibanabana nga mobalor ang tanan og P160.2 milyunes.

Nakalusad sila og 784 ka anti-illegal drugs operations nga niresulta sa pagkasikop sa 880 ka drug personalities, 333 niini giila nga high value individuals ug 547 ang street level.

WANTED

Nakadakop usab sila og 560 ka wanted persons nga adunay mga pending warrant of arrest nga giluwatan ang korte sa managlahing kaso 177 niini mga most wanted.

Nakalusad silag 3,131 ka Comelec checkpoint operations ug naka isyu silag 6,554 ka citation tickets sa mga motorista nga adunay nagka lainlaing traffic violations.

Human matapos ang election period, matod ni Tagle, npagawas siyag kamandoan sa iyang mga tawo nga motutok na sila sa anti criminality campaign.

“Ang directives nako sa mga police station commanders karon ipadayon ra gihapon ang atong trabaho be vigilant kay kato election man to karon normal nata mangawas gihapon ang mga criminal,” matod ni Tagle.

Lakip sa iyang mando ang pagpahugot pa sa ilang gubat batok sa illegal nga drugas ug bungkagon ang mga giilang suyopanan o drug den sa dakbayan.

Nakita niya ang kamahinungdanon sa pagpuhag sa illegal nga drugas sanglit nahimong malinawon ang siyudad tungod kay nahipos naman ang mga kriminal.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph