Daw susama og paraiso, ang isla sa Malapascua sa Amihanang Sugbo usa lang sa kapin 160 islands ug islets sa Lalawigan sa Sugbo nga balik-balikon gyud og suroy sa mga turista, langyaw man o lokal.

Perfect nga suroyan ang Malapascua alang sa kadtong mahilig og snorkeling, diving ug island hopping.

Kon diver ka, haom nga suwayan nimo ang pagsawom kauban ang sikat nga thresher sharks sa Monad Shoal.

Apan ayaw kabalaka, nahimo na sab nga paraiso alang sa mga non-diver ang Malapascua tungod sa kadaghan niining gitanyag nga nindot ug talagsaong talan-awon ug kasuroyanan.

Usa na ini ang katin-aw sa tubig ug kapino ingon man kaputi sa bas nga makapa-relax gyud sa mga turista.

Idugang pa nimo ang kaanindot sa view sa palibot sa isla kon mosawop na ang adlaw.

Naa pa ba moy gustong suwayan aron makompleto ang iyang bucket list sa pagsuroy sa Malapascua?

Diay pipila sa akong mga suggestion basin inyong mauyonan.

ISLAND ACTIVITIES Snorkeling/Diving Coral Garden

Ang labing sikat nga snorkeling spot sa isla mao ang Coral Carden. Dinhi imong makita ang mga nagkadaiyang kolor sa isda ingon man klase-klaseng porma sa mga coral.

Gitugot ang paglawog sa mga isda sa dapit aron mas daghan pang mga isda ang motumaw.

Japanese shipwreck

Gawas sa thresher sharks, naila usab ang Malapascua sa wreck diving.

Usa na ang Tapilon Wreck nga giingong cargo carrier sa mga Hapon nga gibombahan ug nalunod sa isla niadtong World War II.

Tungod sa kadugay, bugtong bukog nalang sa starboard sa maong barko ang makita sa mga diver.

Dakit-Dakit Islet

Nahimo sab nga sikat nga snorkeling ug diving spot ang Dakit-Dakit islet.

Dinhi inyong makita ang maanindot nga corals, pipefishes, flatworms ug seahorses.

Kon ganahan ka og gamay nga adventure, pwede sab nimo nga suwayan ang pagsawom sa rock hole apan gikinahanglan nga mag-amping sanglit talinis ug makasamad ang mga bato.

Gawas ining tulo, aduna pa say uban nga pwede nimong suroyon nga naglakip sa;

* Los Bamboo Cliff

* Langub Beach - giilang pinakanindot nga dagat sa isla tungod sa lapad ang shoreline ug tin-aw ang tubig.

* Guimbitayan Beach

* Bounty Beach - dinhi naglaray ang mga resort ug restaurant

* Lighthouse

UNSAON PAG-ADTO?

Kon nanukad sa Cebu City North Bus Terminal, sakay og bus o van paingon sa Maya Port sa Lungsod sa Daanbantayan nga adunay P260 maoy pleti sa bus.

Aduna say masakyan nga van nga mokantidad sa P350 ang pletehan samtang ang biyahe molanat ngadto na upat ngadto na sa lima ka oras.

Pag-abot sa Maya Port, gikinahanglan una ka nga mobayad sa environmental fee nga mokantidad sa P75.

Gikinahanglan pa nga mosakay og bangka paingon sa Malapascua Island kon diin mokantidad ang plete sa P150-P200.

Gikinahanglan nga adunay ikapakita nga booking confirmation sa accredited hotel o resort sa isla.

Ang labing importante, mao ang pagsul-ob sa facemask.

ACCOMMODATION

Atol sa akong pagbisita kauban sa akong barkada, sa D’Avila’s Horizon ang among napiling istaran.

Nindot ang dapit sanglit layo kini sa mga naglaray nga beach resorts sa isla nga mas mingaw ug hapsay.

Nindot usab ang view sa sunset ug dako ang shoreline niini ug siguradong malingaw gyud ka sa imong pagkaligo sa dagat.

Mokantidad sa P8,000 ang among nabayran sa na-book nga family room nga igo sa walo ka tawo.

Apan kon nangita ka og budget-friendly nga accommodation, suwayi ang Malapascua Budget Inn.

Busa, atol sa pagsuroy, ayaw kalimot nga safety first ug i-practice ang LNT habit kun “leave no trace.” (Hulagway gikan ni Kent Hervas)