Giawhag ni Assistant Secretary Salvador Diputado sa Department of Agriculture (DA) ang mga mag-uuma, mananagat ug livestock producers sa pagpa-insured sa ilang mga tanom ug binuhi.
Si Diputado naluoy sa maong sektor human sila giigo sa pandemya ug sa bagyong Odette, diin paglabay sa maong mga kalamidad, nahagba ang ilang panginabuhian.
Ang opisiyal sa DA nga maoy nakatutok sa agrikultura sa Visayas nagkanayon nga katambayayong sa mga mag-uuma ang ang Philippine Crop Insurance Corporation (PCIC) ug way bayad ang pagpahimulos niini.
“Ang privilege nga gi-offer sa gobyerno, libre. You dont have to pay anything kay libre man na. But just the same di lang gyud ganahan ning mga tawo nga mo-avail sa benefits mao nang sayang pud ba,” padayag ni Diputado.
Matod pa niya nga gawas sa crop insurance, apil usab niini ang livestock, fishery ug ang mga coconut plantation nga maoy sagad maapektohan kon adunay kalamidad sama sa kusog nga bagyo.
Gihulagway sa assistant secretary nga niadtong paghuyop sa super typhoon Odette, makakobra unta ang mga mag-uuma sa ilang insurance para magamit sa subling pagpabarog sa ilang livelihood.
Ang mga mag-uuma nga gusto magpa-insured sa ilang mga tinanom ug binuhi mahimong moadto sa labing duol nga buhatan sa PCIC aron sila makapangayo og forms ug mahimo nang protektado ang ilang panginabuhian.