Si Mandaue City Mayor Jonas Cortes migasto sa labing taas sa kampanya sa tanang mga kandidato nga lokal sa dakbayan sa Mandaue atol sa eleksiyon, matod sa Commission on Elections (Comelec) Mandaue City.
Si Manlalaban Michael Angelo Sarno, Comelec-Mandaue election officer IV, nitug-an sa SunStar Cebu niadtong Miyerkules, Hunyo 8, nga base sa statements of contributions and expenditure (Soce) ni Cortes, kini nigasto og P692,093.
Mas taas kini og gamay sa iyang miaging Soce niadtong 2019 mid-term elections, diin nideklarar siya og P674,300.
Ang iyang running mate nga si Bise Mayor Glenn Bercede nideklarar og P107,066.
Samtang ang ilang kaatbang nga si mayoral candidate Nilo “Olin” Seno nideklarar og P300,000 ug si vice mayoral candidate Elmer Cabahug nideklarar og P80,594.
Wala hinuon matino ni Sarno ang kinatibuk-ang gasto sa independent vice mayoral candidate nga si Gepind Requierme.
Matod niya, diretso nga gipadala ni Requierme ang iyang Soce sa Comelec Manila pinaagi sa web.
Ang Mandaue City adunay kinatibuk-an nga 34 ka mga kandidato sa miaging Mayo nga eleksyon, ug silang tanan nakasumite sa ilang mga SOCE sa gitakdang oras sa tagal sa Hunyo 8, sumala ni Sarno.
Sa tanang kandidato, ang kandidato sa independenteng konsehal nga si Estrella Gesta ang adunay labing ubos nga kantidad sa Soce nga gideklarar, nga P1,510 lang.
Ang Section 14 sa Republic Act 7166 kun Synchronized National and Local Elections and Electoral Reforms nag-require sa pag-file sa Soce sa tanang gideklarar nga mga kandidato sa eleksiyon.
Ang mga kandidato nga mapakyas sa pagsumiter sa ilang Soce pamultahon og P1,000 hangtod sa P30,000 sa una nga kapakyas sa pag-file ug P2,000 hangtod sa P60,000 sa ikaduha ug o sunod nga kapakyas sa pag-file sa Soce.
Did-an usab sila nga modagan sa bisan unsang posisyon sa gobyerno.
Ang kantidad sa silot mahimong magkalainlain depende sa posisyon nga gipapilian.
Dugang pa, ang mga modaog nga kandidato nga napakyas sa pagsumiter sa ilang Soce dili makalingkod sa katungdanan hangtod sila makatuman sa naasoy nga rekisito.
Hinuon, sumala sa Comelec, mahimong maka-file sa Soce bisan humana ang tagal sa Hunyo 8 apan, adto na sa ilang ulohang buhatan sa Comelec sa Manila nga duna nay multa.