Ang Land Transportation Franchising and Regulatory Board (LTFRB-7) mopahigayon og hearing sa petisiyon alang sa P2 nga usbaw sa minimum nga pletihan nga giduso sa mga PUJ operator.
Si Regional Director Eduardo Montealto sa LTFRB 7 nitug-an nga nakadawat na sila sa petition niadtong Huwebes.
Ila kining ipaubos sa review ug kon wala silay makita nga kuwang, ilang pahibaw-on ang petitioner aron sila maka-publish sa pamantalaan nga adunay hearing, posible sunod semana.
Ang mga petitioner mao ang Partylist 1-United Transport Koalisyon (1-UTAK), Cebu Integrated Transport Multi-Purpose Cooperative (CITRASCO MPC), Visayas United Drivers Transport and Multi-Purpose Cooperative (VUDTRASCO), Mactan Lapu-Lapu Mandaue Transport Cooperative (MLMTC), Talisay Minglanilla Naga San Fernando Carcar Transport Cooperative (TMNSCTC), Mandaue Sabang Danao Multicab Operators and Drivers Multi-Purpose Cooperative (MASADAMOD MPC) ug Mauswagon Transport Cooperative.
Ang pangulo sa LTFRB 7 nagkanayon nga lahi ang pamaagi sa pagpuyo ug taas ang minimum wage sa Luzon labi na sa Metro Manila hinungdan nga iyang gihulagway nga kon aduna may usbaw sa pletihan, dili kini molapas sa pletihan sa Manila nga P10 sanglit nausbawan sila og P1 sa nakalabay nga adlaw.
Matod ni Montealto nga ang pletihan sa PUJ sa Manila wala mosaka sulod sa sa dugay nga katuigan apan nahimo kining P9 gumikan sa pandemya apan gipatuman kini sa tibuok nasod hinungdan nga nahimong P9 usab ang minimum fare dinhi sa Cebu ug Visayas, apil na ang Mindanao.