“DING nwan nang bitis ning guru ila mu kabud paralan
bang dasnan ing dalise makaparikil a kasuywan.
Duruku ku karing tukal nang bitis a maki-dakilang kasdanan at kagalangan.
King kapamilatan ding tukal nang bitis ninu man malyaring makalipat
king dagat ning dusa at atanggap ing pakalulu nang Krisna.
Ing kabud ku mu pagnasan ya pin
ing maging dalise ing kanakung panimanman
kapamilatan ding amanung manibatan king keyang tukal a asbuk.
Ing kalawat karing tukal nang bitis ya pin ing kapantasan
a magpakasna karing sablang kapagnasan.
Bubusni na la ding medalumdum kung mata
at kakatmwan ne ing pusu ku king e pangkaraniwang belwan.
Ya ing ginu ku beytan kaybat ding beytan.
Manibatan kaya ing makalibub a dalise lugud.
King kapamilatan na ing kelambelwan malalasak.
Ding aklatblewan magdalit la dikil king keyang pangatau.
Ing kekatamung guru ing dagat ning pakalulu,
ing kakaluguran ding pakakalulu,
at ing ginu at talaturu ding talasuyu.
O Guru! Malunus ka kanaku.
Ipagkalub mu sana ing salilung ding nwan mung bitis.
Ing bentugan mu makalaganas karing sablang atlung labwad.”
~ Dalangin king Pangdiwang Panginwan,
nang Narottama dasa Thakura.
“Ing guru tatanggap yang kalam
manibatan king dayat malat ning pakalulu.
Nung makananung ing biga mitutugtug yang danum
king silab king kagubatan bang patdan iti,
antita mu naman a ing guru kakabus na la
ring magkakasakit a labwad kapamilatan ning pamamatda
king mikakalabkab a api ning pamiiral a makalabwad.
Daraun ku ing magalang kung pamanduku karing nwan nang bitis
ning gurung iti, metung a dayat malat ding makasaup a katangyan.
Tutunggen na ya ing Banal a Lagyu,
teterak king saring ligaya, magdalit, at manigtigan malawiwing panigtig,
Ing guru parati yang sasaya kapamilatan ning pangamaldang pamigale
a pamigunyat nang Ginung Chaitanya Mahaprabhu.
Uling nanamnaman na la ring miyayaliwang lambis ning dalise
pamitagulaling a kasuywan kilub ning isip na,
Misan ing bwak na manalakad sikoti,
makaramdam yang pamangalgal king katawan na,
at ing lwa tutulu manibatan karing mata na anting alun.
Daraun ku ing magalang kung pamanduku
karing nwan nang bitis ning gurung iti.
Ing guru parati yang gugunyat
king pamanyamba kari Radha at Krishna,
At abe na lang gugunyat ding talatuki na
king pamanyambang iti.
Gagayak da la ring Nwan a Larawan
king mangalagung imalan at kalakuti.
Lilinisan de ing pisamban Da,
at darapat lang anti rening pamanyamba king Ginu.
Daraun ku ing magalang kung pamanduku
karing nwan nang bitis ning gurung iti.
Ing guru parati yang miyayampang kang Krishna
karing apat a kauryan ding manganyaman a pamangan.
[pagaralan anting didilatan, lalangutan, inuman at sisipsipan].
Ampat ing guru akakit nang ding talasuyu kakabsi na la,
kakabsi ne ya naman.
Daraun ku ing magalang kung pamanduku
karing nwan nang bitis ning gurung iti.
Ing guru parati yang masigasig dandam
at gumale dikil karing alang palugit
a libangan da ri Radhika at Madhava,
at ding karelang katangyan, ding lagyu da at ding aske da.
Ing guru pakikwanan na lang namnaman deti balang penandit.
Daraun ku ing magalang kung pamanduku
karing nwan nang bitis ning gurung iti.
Ing guru makamal yang tune,
uling pantas ya king pamanantabe karing gopis,
A karing miyayaliwang penandit gagawang miyayaliwang talatag
para king kapantasan ning pisulung pamikalugud
da ri Radha at Krishna karing kagubatan ning Vrindavan.
Daraun ku ing magalang kung pamanduku
karing nwan nang bitis ning gurung iti.
King kapamilatan ning pakalulu ning guru ninu man
tatanggap king kalam nang Krishna.
Nung e king pakalulu ning guru, ninu man e malyaring mikakasaplalan.
Inya sa’t, sukat keng parating gagnakan at pupuryan ing kanakung guru.
Agyang makatatlu mung ukdu idaun kung sukat
ing magalang kung pamanduku karing nwan nang bitis ning gurung iti.”
~ Samsara Davanala Lidha Loka (Sri Gurvastakam)
Śrī Śrī Gurv-aṣṭaka
Eight Prayers to the Spiritual Master
by Śrīla Viśvanātha Cakravartī Ṭhākura
“Pakikwanan mung apanigaralan ing katutwan
kapamilatan ning pamaglapit king guru.
Mangutang mapakumbaba kaya at miyapse pamanyuyu kaya.
Ing kaladwang mekakilala na king sarili malyari yang midake belwan keka
uling ikit na na ing katutwan.
At nung apanigaralan mu na pin ing katutwan,
abalu mung deng sablang mabibye dake
Ku la ngan - - at ing ati lu Kanaku, at Kanaku la.
Agya mang metanggap kang pekamakasalanang dili karing makasalanan,
kabud makabili ka king daung ning kamigit-migitang belwan,
alagpusan mu na ngan ing laut ding kasakitan.
Nung makananung ing aping lalagablab gagawan nang abu ing tatamban,
O Ardyun, makanyan mu namang ing api ning belwan dadapugan na lang anting abu
ding sablang ablas ding makalabwad a kararaptanan. ”
~ Dalit ning Kakataskatasang Panginwan ǀ Dangka 4, Sunis 34- 37
(The Song of God 4:34-37)
***
Makapasyag king Juan 4:16:
“Ginu,” nganang Tomas, “E mi balu nung nu Ka munta, inya makananu ming abalu ing dalan? Mekibat ya I Yesus, “Aku ing dalan, ing katutwan at ing bye.” Alang makalapit king Ibpa nung e king kapamilatan ku. Nung akilala mu na ku, abalu me ing Ibpa ku mu naman. Magmula ngeni balu yu ne Ya at ikit yu ne Ya.”
King Mateu 11:27 naman:
“Ding sablang bage mipaparala kanaku ning kanakung Ibpa: at alang taung makibalu king Mambang nung e ing Ibpa: at alang mamibalu king Ibpa nung e ing Mambang, at kaninu na man ibulalag ning Mambang kaya.”
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king "garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.