HUMAN nakita ni Ormoc City Mayor ug Congressman-elect Richard Gomez ang video sa tulo ka mga kawani sa local government unit (LGU) nga nagbugalbugal sa usa ka tiguwang babaye sud sa terminal, iya dayon kining gipatangtang sa trabaho.
Si Gomez, kinsa outgoing na sa pagkamayor human napiling kongresista sa ikaupat nga distrito sa Leyte, nitan-aw sa nag viral nga video sa social media.
Nakita sa video nga upat ka mga lalaki, tulo niini giingong mga kawani sa LGU Ormoc City samtang ang usa sa usa ka kooperatiba, nagpatidpatid sa tsinelas sa tiguwang babaye.
Ang ginang naggukodgukod kon asa mahiadto ang iyang tsinelas samtang nagkatawa ang upat ka mga lalaki nga nagpuli-puli og patid.
Daghang netizens ang wa nakauyon ug ningsaway sa gibuhat sa mao nga mga lalaki.
Wa sila nasayod nga nakuhaan og video ang ilang gibuhat ug gi-upload sa social media.
Si Gomez masuk-anong nimando sa pagtangtang dayon sa tulo human kini niya nakita.
“Walay lugar diri sa Ormoc ang mga abusado sa mga babae. Tiguwang o bata, bisan unsa pa siya, dapat kamao ta morespito nila. Dili ta magbugal-bugal," matod ni Gomez.
Matod niya nga sa iyang administrasiyon iyang kanunay panalipdan ang mga katungod sa kababayen-an.
"In my administration, I assure you, we will protect and uphold the rights of the women. Bisan pa trabahante sa gobyerno o bisan kinsa pa na, ayaw mo pag abusar kay di ko magduha-duha pagtangtang ninyo ug manubag mo sa balaud,” dugang sa mayor.
Ang tiguwang babaye, gibana-banang labing minos 70 anyos na, naila sa dapit sa alyas "Sharon."
Wa kini tinong pinuy-anan,apan kanunay makita nga magtambay sa food park ug terminal.
Wa makuha sa Superbalita Cebu kon asa nga departamento na-assign ang tulo. (REV)