Ang Golden State Warriors (GSW) nagkinahanglan pa og 43 puntos gikan sa ilang superstar aron pildehon ang Boston Celtics sa ingon tablahon ang series 2-2 sa NBA Finals.
Si Stephen Curry maoy nangulo sa kadaugan, nag-inusara sa Warriors nga adunay lapas 20 puntos aron dad-on pagbalik ang series sa Bay diin ang best of seven series karon nahimo nang best of three.
Nidugang og 10 ka rebounds si Curry ug iyang napasulod ang 7 gikan sa 14 niya ka itsa sa three point area.
Napasulod ni Curry ang iyang duha ka field goals sa 10-0 run sa fourth quarter aron ilugon ang labaw 100-94 diin ang Celtics wala makapasulod sa ilang unom ka sunodsunod nga mga tira.
Niabag og 17 puntos si Andrew Wiggins uban sa iyang 16 ka rebounds. Ang Warriors maoy mo-host sa game 5 karong Martes aron ilugon og balik ang homecourt advantage kon moabot sa game 7 ang ilang series.
Si Warriors coach Steve Kerr nibilib sa iyang mga magduduwa taliwa sa maayong labok nga gipakita batok sa Celtics.
“Just stunning. The physicality out there is pretty dramatic. Boston’s obviously got the best defense in the league — huge and powerful at every position — and for Steph to take that kind of pressure all game long and still be able to defend at the other end when they are coming at him shows you this is the strongest physically he’s ever been in his career,” padayag ni Kerr.
Ang star sa Celtics nga si Jayson Tatum igo lang nipuntos og 23 ug 11 rebounds samtang 21 puntos ang kang Jaylen Brown ug 12 rebounds kang Robert Williams III alang sa Boston.
Ang shooting guard sa Celtics nga si Derrick White kinsa niabag og 16 puntos nagkanayon mga minos ang player movement ug way klaro ang ball rotation sa ilang team butang nga ilang likayan sa game 5 sa San Francisco.
“No player movement, no ball movement. We’ve just got to do a better job executing down the stretch. That’s the game right there,” matod ni White.
Ang head bench tactician sa Celtics nga si Ime Udoka nihatag og kredito ngadto sa Warriors team.
“Credit to them. We knew it wasn’t going to be easy. They weren’t going to come in and lay down. We had our opportunities, especially in the first half,” matod ni Udoka.
Gumikan sa ilang kapildehan, ang Celtics nagkinahanglan og usa ka daog aron hatagan og dakong tsansa ang ilang ika-18 nga kampyonato sa NBA.