Karong tuiga ipahigayon na sab dinhi sa Sugbo ang Ironman nga anha na sab manukad sa Dakbayan sa Lapu-Lapu. Sulod na sa duha ka mga tuig nga wa ni napahigayon dinhi tungod sa Covid-19 pandemic.
Ang nakaanindot kay tipik sa biking portion sa international triathlon event anha motadlas sa bag-ong gibuksan nga Cebu-Cordova Link Expressway (CCLEX). Ambot og mapangandaman ba kaha ni kay duna ra bay mga road works nga gihimo ang Dept. of Public Works and Highways (DPWH).
Karon usab, gipahigayon ang Asian MTB Championships sa dakbayan sa Danao, apan mingaw man kaayo. Kuwang kaayo sa media mileage ang kalihukan nga unta international competition man ni. Akong gitawgan ang among sports editor nga si Erwin Lirazan kon duna bay imbetasiyon nga gipadala kanila. Matod pang Erwin, way bisan usa ka imbetasiyon nga niabot sa local media.
Nahibung gani si Erwin kon nganong wa nagpatawag ang Danao City og press conference nga unta kaniadto, sa ingon ani kadako nga event, magpatawag man sila og journalists.
Sa Facebook na lang ko nasayod nga duna diay dakong biking competition sa Danao City pinaagi sa posts sa akong social media friends nga nakaapil samtang ang uban dunay mga higala nga nangapil sa kompetisiyon.
MO-PROMOTE
Ang ingon niani nga event mag-promote man gud sa sports tourism, labina sa Dakbayan sa Danao nga maoy gauna niini. Mopalambo sab ni sa competitiveness sa atoang local ug national athletes kay duna na man silay maensayuhan o mapraktisan nga dapit kon moari sila dinhi sa Sugbo. Di ra ba daghang mga dapit sa Pilipinas nga dunay bike park.
Nagtuo man gud ning sports organizers karon nga igo na ang Facebook pag promote sa kalihukan. Ang wa nila masayri nga sa print ug digital, dako kaayo og bentaha ang magpa media mileage. Sa digital lang daan, sa amoang kaso, milyunes ang mobasa sa amoang digital page. Lapad pa kaayo ang reach.
Libre man unta ning sports coverage. Wa na kinahanglana pang mo advertise.
Ako mismo, basta biseklita lang, full support ko. Kon dunay mga biking event, mahimo ra kong i-DM kon gikinahanglan ang pagsuwat. Ako mismo ang mangunay og suwat. Mahimo ra kong imbetahon. Wa tawon nay bayad.
SUPORTA
Sa bisan unsa nga klase sa sports, gikinahanglan ang media mileage baya. Mang invite man gani nang dagko nga sports organizers og media kay nakahibawo sila nga mao ni ang paagi sa pagkuha usab og sponsors.
Natural baya kon sponsor ka, mangita sab og unsay imong makuha nga exposure sa kalihukan. Unsay makuha kon mopagawas og kwarta, o kaha items isip premyo. Apil na ana ang media exposure.
Hinaut pang mobalik na ang sports organizers sa pag-invite og media sa dagkong mga kalihukan. Kay amoa man gyud nang suportahan kay dako baya sab na nga exposure sa Sugbo kon dunay international sports event. Mosugot ta o sa di, dako kaayo og ikatabang ang sports sa tourism industry, labina ang cycling.