Di ko makalimot sa mga higanteng rali dinhi sa Sugbo kaniadtong ubos pa kita sa balaod militar sa panahon sa amahan ni incoming President Ferdinand “Bongbong” Marcos Jr.
Pero wa ko mag-atang og dakong kalihokang protesta karong adlawa dinhi sa atua. Daghan ang mga rason, sa akong pangagpas.
Pananglitan, wa modulot sa balatian sa mga Filipino karon ang nasyonalismo. Samtang masuko kita nga gidaogdaog sa mga Insek diha sa West Philippine Sea, apan di man ingon sa una ang kainiton sa kalagot nga mosuporta na og mga protesta sa kadalanan.
Lahi ra gyud ang mga Filipino kay sa mga taga Ukraine nga mosukol sa Russia. Wa sila moduko ug magpa-awt. Apan kita? Ambot, daghan kaayo ang nidayeg sa talawan nga naa karon sa Malakanyang.
Naa man gani masuko sa mga Pinoy nga mopadayag og pagsuporta sa Ukraine sa pakigbisog niini batok sa Russia.
Suporta
Sa pagkakaron, di pa nato maklaro kon unsa gyud ang foreign policy unya ni Presidente Marcos. Sa pagkakaron, akong masabtan nga gikinahanglan niya ang suporta sa daghang mga nasud alang sa political legitimacy.
Mao nga dako kaayo nga pang-propaganda ang pagbisita kaniya sa mga foreign diplomats ug ang pag-congratulate sa Estados Unidos ug Tsina.
Importante kini kay daghan ra ba gyud sa mga foreign investors ang nilikay sa Pilipinas dihang nahibaw-an nga si Marcos diay ang midaog sa miaging piliay.
Mahinungdanon alang sa umaabot Marcos administration ang legitimacy samtang walay seryusong reklamo sa resulta sa piliay.
Wala lagi protesta apan daghan ang wa motuo sa giingong imaginary 31 million.
Giguba
Wa gyud makasabot ang kasagaran dinhi sa Syudad sa Sugbo, lakip na si Mayor Mike Rama, nga maguba ang lokal nga ekonomiya sa panahon nga mahimo na nga world class mall ang Carbon.
Alang sa mayor ug kadaghanan dinhi sa syudad, ang paglimpyo lang sa merkado sa Carbon ang importante. Sa niining tumong, nisulod ang kagamhanan og usa ka joint venture agreement (JVA) uban sa Megawide Development Corporation nga daghan og apan aron lang malimpyo ang Carbon.
Kasagaran sa mga apan kun mga kahuyangan sa maong proyekto gihisgutan sa kasong gisang-at sa Carbon Alliance ug, sukwahi sa pangangkon sa mga opisyal sa City Hall, Megawide, ug sakop sa media, nagpadayon pa kini.
Wala gibasura sa korte ang maong kaso. Gani, naa kini karon sa ang-ang sa mediation.
Kaniadtong bise mayor pa siya, nakahisgot si Mayor Rama sa maong mga apan ug nanginguha kini nga maremedyuhan ang maong kasabutan.
Apan karong mayor na siya, nausab na ang iyang baruganan. Nangusog na kining mapadayon ang maong proyekto bisan pa man og naay kasong nakaung-ong.
Sa akong tan-aw, mosamot ang paninguha karon sa mayor aron mapapas diha sa Carbon ug sa Sitio Bato sa Barangay Ermita ang nagpundok nga mga wala mamotar kaniya sa miaging piliay.
Ambot, sa hunahuna sa mayor, lider lang siya sa mga namotar kaniya.
Tuod man, wala pa gyud seryuso nga matubag sa administrasyon ni Mayor Rama kon unsay mahitabo sa ekonomiya sa Sugbo inig matukod na ang world class mall hulip sa merkado sa Carbon.
Asa na man mamalit og mga baratong sangkap pananglit sa barbecue ang mga kabus nga sidewalk vendors sa tibuok vendors.
Bisan ang mga adunahang negusyante nga nangiyawat sa kabarato sa mga supplies nga mapalit sa Carbon aron mabuhi ang ilang mga negusyo sa lainlaing parte sa Sugbo. Kini, gipiyungan lang kay alang sa mayor, mas importante ang limpyo nga Carbon. (DM nako sa @anol_cebu)