Amahan mipamabdos sa iyang 13 anyos nga anak nga iyang gihimong sex slave sukad sa nag-edad pa kini og 10 anyos.
Wa na makaaguwanta ang anak, nisumbong na kini sa iyang maguwang sa gibuhat sa iyang amahan kaniya.
Ang suspek nga si Danny (ti dinuod niyang ngan), 50, biyudo, mag-uuma, nasikop mga alas 5:15 sa hapon sa Biyernes, Hunyo 10, 2022 sa Brgy. Mantalongon, lungsod sa Dalaguete, habagatang Sugbo.
Ang 13 anyos nga tinun-an sa grade 6 nitug-an sa iyang maguwang nga 30 anyos nga gihilabtan na usab siya alas 6:00 sa buntag sa Biyernes sulod sa ilang balay.
Gumikan niini, ilang gi-report sa kapulisan ang gibuhat sa ilang amahan mga alas 4:00 sa hapon sa samang adlaw.
Si Major Gilfred Baroman, hepe sa Dalaguete Police Station nga nahinabi sa Superbalita Cebu, nagkanayon nga ang bata niasoy nga 10 anyos pa siya dihang gisugdan na siya sa pagpahimulos sa iyang amahan.
Sa Lunes, ilang ipa-medical check up ang biktima sanglit dako na ang tiyan aron masuta kon pila na ka buwan nga buntis ang bata.
Ila usab kini ipailawom sa psychological test tungod sa makahahadlok kaayong kasinatian sa mga kamot sa iyang amahan.
Ang biktima maoy ikalima sa unom ka mga managsuon
Ang ilang inahan mitaliwan na sa laing kalibutan 11 ka tuig ang milabay.
“Nahimo niyang sex slave ang bata, kanang mahubog ning (Papa) kamangon niya (ang anak). Unya mahadlok intawon motug-an,” dugang ni Baroman.
Nasuta nila sa ilang pagsusi nga midako ang tiyan sa biktima kay buntis.
Sumala pa ni Baroman, nga dili na gyud matago kay dako na ang tiyan sa bata.
“Ana intawon siya nga ‘si Papa may nakapabuntis nako’ dungan sa pagpatulo sa luha,” sumala ni Baroman
Ang mga sakop sa Women and Children Protection Desk (WCPD) sa Dalaguete Police Station nag-andam na og affidavit alang sa kasong incestuous rape nga may kalambigitan sa Republic Act (7610) kun Special Protection of Children Against Abuse, Exploitation and Discrimination Act.
Sa ingon niini nga mga kaso, ang korte di motugot og piyansa sa akusado.