MOKABAT sa 18,288 ka mga bata nga nag-edad lima hangtod 11 sa Cagayan de Oro ang nakadawat na sa ilang ikaduhang dose sa bakuna sa Covid-19, gitaho sa City Health Office kaniadtong Sabado, Hunyo 11, 2022.
Matud ni Dr. Teodoro Yu Jr., medical officer sa City Health Office, 91,841 ang target population sa Covid-19 vaccination rollout para sa mga bata nga nag-edad og lima hangtod 11 anyos sa Cagayan de Oro.
Ingon ni Yu nga 35.65 porsyento sa kinatibuk-ang target nga populasyon o 32,748 ka bata nga nag-edad og lima hangtod 11 ang nakadawat na sa ilang unang dose sa bakuna sa Covid-19.
Matud sa data sa City Health Insurance Office Data Management Team, ang dakbayan sa Cagayan de Oro nakatala na sa kinatibuk-ang 553,899 ka mga tawo nga fully vaccinated o 92.32 porsyento sa target nga populasyon nga anaa sa 599,929.
Ang maong target population naglakip sa mga bata nga nag-edad ug 12 anyos pataas.
Ang Cagayan de Oro nakatala usab og 142,056 ka mga indibidwal nga nakadawat na sa ilang booster shots.