Giandam na sa Golden State Warriors ug Boston Celtics ang ilang mga bala alang sa importante nga Game 5 sa National Basketball Association (NBA) Finals sa Martes, Hunyo 14, 2022.

Ang Warriors taas ang kadasig human nila mapilde ang Celtics sa Game 4 sa iskor nga 107-97 didto sa Boston aron tablahon ang best-of-seven series, 2-2.

Tungod sa kadaogan, nabawi pagbalik sa Warriors ang homecourt advantage.

Sa pagbalik sa California, usa sa unang gibuhat ni Thompson mao ang pag-meditate didto sa dagat sa Bay Area.

Gi-post ni Thompson nga naligo siya sa dagat nga adunay caption: “The ocean heals the mind, body and soul.”

Usa si Thompson sa key players alang sa Golden State uban nila ni Stephen Curry, Andrew Wiggins, Jordan Poole, Draymond Green, Kevin Looney ug Otto Porter.

Si Thompson mitunol og 18 puntos sa Game 4, samtang ang iyang partner sa “Splash Brothers” nga si Curry nagmangtas nga adunay 43 puntos, 10 ka rebounds ug upat ka assists.

Sa laing bahin, ang usa sa pambato sa Boston nga si Jayson Tatum, nanaad nga mobawi sa ilang kapildihan sa Game 4.

“I just got to be better,” matod ni Tatum. “I know I can be better, so it’s not like I, myself or my team is asking me to do something I’m not capable of. They know the level and I know the level that I can play at.”

Si Tatum nakamugna og 23 puntos, 11 ka rebounds ug unom ka assists. Apan bati ang iyang shooting performance nga anaa lang sa 8-of-23 aduna pud siyay unom ka turnover.

Ang Celtics mosalig pud sa kontribusyon nila Al Holford, Jaylen Brown, Marcus Smart, Derrick White ug ubang bench players.

Ang Celtics maoy midaog sa Game 1 ug Game 3, samtang ang Game 2 ug 4 giharian sa Warriors.