Nakadawat og pasidungog ang mga Sugbuanong atleta nga midaog og medalya sa Southeast Asian (SEA) Games sa ilang pag-uli sa Sugbo.

Mipahigayon og grand homecoming ang Cebu City Government ug ang Cebu City Sports Commission (CCSC) niadtong Sabado sa City Wing Atrium, SM Seaside City Cebu.

Ang mga atletang Sugbuanon dako’g natabang sa Team Philippines sa 31st SEA Games didto sa Vietnam diin midaog og 52 gold medals, 70 silvers ug 105 bronzes ang delegasyon sa Pilipinas.

Tungod sa ilang gihatag nga dungog sa Sugbo, gimugna ang grand homecoming alang kanila.

Ang mga atleta nga gipasidunggan mao sila Pearl Cañeda, Wilbert Aunzo, Elreen Ando, Lois Kaye Go, Alexis Sy, Raven Alcoseba ug Kim Remolino.

Lakip pud sila June Mar Fajardo, Cherry Rondina, Rubilen Amit, Rheyjey Ortouste, Roger Pogoy ug Angelo Marquez apan wala kini makatambong sa activity.

Pinaagi sa recorded message, si Philippine Sports Commission (PSC) Chairman William ‘Butch’ Ramirez ug Commissioner Ramon Fernandez mi-congratulate sa mga Sugbuanong atleta ug sa ilang mga nakab-ot sa SEA Games.

“I hope that the next administration can continue to work with the Cebu City Sport Commission para ma-promote og husto ang atong mga programa sa sports,” matod sa 19-time PBA champion Fernandez nga usa pud ka Sugbuanon.

Anaa sa homecoming sila CCSC chairman John Pages, kanhi CCSC chairman ug dancesport team Cebu City president Edward Hayco, Cebu City Vice Mayor Dondon Hontiveros, SM’s senior assistant vice president for marketing in Visayas Raphael Ryan Batuigas, ug SM Regional Operations Manager Anton del Prado.

“Balik-balikon nato nga ganahan ta modaug but we really want them to build their character and hopefully become our future leaders,” batbat ni Hontiveros.

Ang SEA Games giduwa niadtong Mayo 12 ngadto Mayo 23 didto sa Hanoi, Vietnam.