Human sa kontrobersyal nga executive order (EO) no. 16 nga giluwatan ni Cebu Governor Gwendolyn Garcia nga dili mandatory ang pagsul-ob og face mask sa open area o well-ventilated areas nga daling gisupak sa Department of the Interior and Local Government (DILG), ang Police Regional Office (PRO) 7 nipagawas usab og kamandoan nga sundon ang direktiba sa DILG.
Si Police Brigadier General Roque Eduardo Vega, hepe sa PRO 7, niingon nga magpadayon ang ilang pagpanakop sa mga molapas sa lagda sa Inter-Agency Task Force (IATF).
Una nang nipagawas og pamahayag si Police Colonel Engelbert Soriano, hepe sa Cebu Provincial Police Office (CPPO), nga tumanon nila kon unsa ang naa sa balaod.
Dason ni Soriano, tungod kay nagpabilin nga balaod ang EO 16 sa Probinsya sa Sugbo, motuman sila niini gawas lang kon adunay molalis nga laing ahensiya nga sayop kini.
“The PNP is mandated to enforce the law. Hence, Cebu PPO will support whatever is legal and supported by existing laws. EO 16 of Cebu signed by Hon. Governor Gwendolyn F. Garcia remains the law as far as Cebu province is concerned and we recognize that, unless it is later on invalidated by proper authority, “ matod sa gipagawas nga pamahayag ni Soriano.
Apan alang ni Vega nga ilang sundon ang kamandoan ni DILG Secretary Eduardo Año nga mandatory pa gihapon ang pagsul-ob sa face mask sa tibuok Central Visayas.
Matod niya, iya nang gitawgan ang hepe sa kapulisan sa probinsya sa Sugbo nga tumanon ang direktiba sa DILG dungan sa iyang mando sa tanang city ug provincial police office directors nga sundon ang kamandoan sa ilang ulohang buhatan.
“In compliance with the DILG directives, PRO7 continues to remind the public to observe the minimum public health standards which includes the mandatory wearing of face mask in public places as set by the Inter-Agency Task Force for the Management of Emerging Infectious Disease guidelines,” matod ni Vega.
Gipasabot niini nga dili pa angay nga mokompiyansa ang publiko bisan kon nag-anam nag kagamay ang natakbuyan sa Covid-19.
Gani, ang matag police office gimandoan usab nga hugot nga ipatuman ang pagdakop sa mga makit-an nga wala magsul-ob og face mask ug wa motuman sa health protocol.