Mobalor og P36 milyunes ang 133 ka mga bayanan sa dagkong mga taklobo nga nasakmit sa mga sakop sa Criminal Investigation and Detection Group (CIDG) Regional Field Unit 7 entrapment operation sa Barangay Tapilon, lungsod sa Daanbantayan, amihanan sa probinsya sa Sugbo niadtong Sabado, Hunyo 11, 2022.
Si Police Colonel Ireneo Dalogdog, hepe sa CIDG 7, maoy nangulo sa operasyon nga malampusong nisakmit sa 3,000 kilos nga bayanan sa taklobo ug pagkasikop sa 12 ka mga tawo nga responsabli sa illegal nga buhat sa pagbaligya niini sa usa ka negosyante nga taga lungsod sa Liloan nga si Carla Czarina Cañazares Camacho, 41.
Uban sa operasyon sa CIDG 7 mao si Police Captain Nigel Sanoy, hepe sa CIDG Lapu-Lapu City Field Unit, ug 300th Air Intelligence Security Wing sa Philippine Air Force, Bureau of Fisheries and Aquatic Resources (BFAR) 7 Fishery Law Enforcement Group ug Philippine Coast Guard (PCG).
Unang nakadawat sa impormasyon ang Philippine Air Force labot sa illegal nga pagpangompra sa mga taklobo ni Camacho nga tungod niini ila kining gipaubos sa surveillance.
Dinhi nasuta nga tinuod ang tanang impormasyon diin ila kining ibaligya sa gawas sa Pilipinas aron himuong dekorasyon sa balay o sa mga dagkong establisemento.
Dugang ni Sanoy nga human nga hugot nang gibantayan ang pagpalusot sa ivory o ang sungay sa elepante, ang gihulip niini mao ang mga bayanan sa taklobo.
Gumikan niini, ilang giplano ang entrapment pinaagi sa pagpatuo nga mamalit sila sa maong mga butang.
Dali nga misanong si Camacho ug andam siya nga makahatag og 3,000 ka kilo sa mga taklobo ug didto kini kuhaon sa Daanbantayan.
“Ang sabot sa palit is P12,000 per kilo so kung i-times nato sa 3,000 naa sa 36 million, actually ang product nila ila gyud ning i-export kay accordingly, sir, mao daw ni ang koan panghimuon nila nga home décor, mga lamp sheds ingun ana,” matod ni Sanoy.
Lakip sa nadakpan ang mga trabahante nga sila si Caryl Yanong, 22, operator sa Vertex 1 Apparel nga taga Purok Iba , Barangay Basak , siyudad sa Lapu-Lapu; Gilbert Monterde JR., 25, assistant warehousemen sa Vertex 1 Apparel; Genesis Diamos, 21, taga Purok Hagdanan, Barangay Carnaza, lungsod sa Daanbantayan; Federick Beloria, 18, taga Purok Tahong, Carnaza, Daanbantayan; Ham Diamos, 20; Freddie Beloria, 19; Esteban Natural Jr., 30, habalhabal drivers; Elier Cañete, 46, boat captain; Alex Baslan, 48, boat crew; Clodualdo Petere Jr., 46, taga Purok Sihi, Carnaza, Daanbantayan; ug Salvador Camino Jr., boat crew.
Kalapasan sa Republic Act (R.A.) 8550 kun The Philippine Fisheries Code of 1998 as amended by R.A. 10654 (Prohibiting the act of selling, exporting possession of giant clams).
Daghan matod pa ang wala masayod sa maong balaod, matod ni Sanoy, ilabi na sa mga mananagat.
Iyang gipasabot nga ang pagkuha sa taklobo usa kini ka illegal sigon sa nalatid sa balaod gumikan kay endangered species na man kini bisan ang mga bayanan niini.
Gumikan niini, gipahibawo nila ang mga mananagat sa Sugbo nga likayan ang pagkuha niini sanglit mamahimo sila nga mabilanggo.
Dugang ni Sanoy nga wala pa nila masuta kon dugay na ba sa maong illegal nga negosyo si Camacho sanglit nagpadayon sila sa ilang imbestigasyon.