ANG Department of Social Welfare and Development-Davao Region (DSWD-Davao) ni-delist sa 16 ka benepisyaryo sa Pantawid Pamilyang Pilipino Program (4Ps) karong tuiga tungod sa pagprenda sa ilang mga ATM card, ug ang uban naggamit sa cash assistance alang sa sugal.
Kini ang gibutyag ni John Ruzcel Sampiano, ang DSWD-Davao Regional Grievance Officer sa 4Ps, diin suma niya atol sa virtual presser niadtong Biyernes, Hunyo 10, nga ang mga na-delist nga benepisyaryo gihatagan og duha ka sunod-sunod nga pasidaan, apan nakahimo sila sa samang kalapasan sa ikatulong higayon.
Matud niya nga ang ikatulo nga silot mao na ang katapusan, ug kini maoy awtomatik nga pagtangtang sa 4Ps program.
"That is non-appealable, if ever matanggal sila (they would be removed) [due to] cash card pawning... they are delisted due to misbehavior," ingon ni Sampiano atol sa Kapehan sa PIA press conference.
Dugang pa, 478 ka mga benepisyaryo ang nakadawat sa ilang unang silot, samtang 30 ang nahatagan og silot sa ikaduhang higayon.
Matud pa sa opisyal nga seryoso ang DSWD sa pagpatuman sa programa, nga usa ka conditional cash transfer program nga gipundohan sa gobyerno nga nagtumong sa pagpakunhod sa kakabos pinaagi sa paghatag og mga hinabang ngadto sa hilabihan ka kabus nga mga panimalay aron mapalambo ang ilang panglawas, nutrisyon ug edukasyon ilabina sa mga bata nga nag-edad og 0-14.
Kahinumdoman nga niadtong Abril 2019, gipirmahan ni Presidente Rodrigo Duterte ang balaod nga nag-institutionalize sa 4Ps cash transfer program.
Ang pagka-miyembro sa 4Ps, matud niya, usa ka prebilihiyo nga mahimong bawion kanila bisan unsang orasa.
Gibutyag ni Sampiano nga ang emerhensiya maoy nag-unang rason nganong giprenda sa mga benepisyaryo ang ilang mga ATM card ngadto sa mga loan shark.
"Amo gyud gina-emphasize na dili option si cash card pawning," dugang sa opisyal.
Aron matubag ang problema, ang DSWD gikatakdang makig-alayon sa Department of Interior and Local Government (DILG), ug sa local government unit alang sa posibleng mga silot niining maong patigayon pinaagi sa memorandum of understanding.
Alang sa mga benepisyaryo nga mogamit sa ilang 4Ps ATM o mogamit sa ilang kuwarta alang sa mga katuyoan sa sugal, labi na ang e-sabong (online cockfighting), siya miingon nga higpit nga gibantayan nila kini tungod kay ang paggamit sa cash assistance alang sa sugal ug bisyo higpit usab nga gidili sa programa.
Giawhag niya ang mga adunay kasayuran sa mga malapason nga benepisyaryo sa 4Ps nga i-report kini kanila alang sa angay nga aksiyon.
Si Margie Cabido, DSWD-Davao Division Chief sa 4Ps, niingon nga ang mga benepisyaryo sa 4Ps kinahanglang maghupot sa ilang integridad isip benefactor pinaagi sa paggamit sa kuwarta alang sa importanteng katuyoan.
Aron makatabang sa monitoring, siya miingon nga pipila sa ilang mga personahe ug sa lokal nga gobyerno, pinaagi sa mga barangay, nagpahigayon og regular monitoring ug wala gipahibalo nga cash card monitoring.
Siya niingon nga kon ang mga benepisyaryo mapakyas sa pagpresentar sa ilang cash card atol sa inspeksyon, mahimo na kini nga automatic sanction.
Sukad Mayo 30, 2022, ang DSWD-Davao adunay kinatibuk-ang 275,425 ka aktibong 4Ps household beneficiaries, nga gilangkuban sa 1,503,191 ka indibidwal nga benepisyaryo diin kadaghanan kanila taga Davao de Oro.