WA NA maabti nga buhi ang ulitawo nga nag-unay paghunos sa iyang kinabuhi didto sa Purok 10, Barangay Gabi, Compostela, Davao de Oro alas 10:45 sa gabii niadtong Sabado, Hunyo 11, 2022.

Gibutyag nga ang biktima nga si Joel Estremos Hinampas, 32, dunay kapuyo ug molupyo sa nahisgutang dapit, nagpahibawo pa pinaagi sa pag-video call sa iyang pag-umangkon nga si Ma. Cristel Hinampas aron magpahibawo nga siya magpakamatay.

Matud pa nga si Jave Hinampas, igsuon sa biktima ug amahan ni Cristel, mao nay nagguba sa sira sa pultahan sa balay sa biktima kon diin iyang nakaplagan nga nagbitay na kini sa kisame nga wa na'y kinabuhi sulod sa kuwarto gamit ang kolor itom nga pisi.

Gisulti ni Jave nga hubog ang biktima dihang nakig-video call sa iyang anak nga si Cristel hinungdan nga gidali niya pag-adto sa balay niini apan wa na niya kini maabti pang buhi.

Dugang gibutyag niini nga ang kapuyo sa biktima atua nanarbaho sa Saudi Arabia ug nagtuo nga ang pagpakamatay sa igsuon gumikan sa problema sa pamilya.

Patay'ng lawas sa biktima gipahiluna sa Lord Anthony Funeral Parlor sa Purok 1-A, Poblacion, Montevista.

Sa mga nakasinati og depresyon ug nangita og ma-istorya, mamahimong mokontak sa 0966-351-4518/0917-899-8727 ug 0917-899-USAP alang sa Globe/TM Subscribers samtang 0908-639-2672 sa Smart/Sun/TNT Subscribers.

Mahimo sab nga mangayo og tabang sa Hopeline ug National Center for Mental Health Crisis Hotline sa Pilipinas.

Hopeline PH's 24/7 hotlines: 0917-558-4673 (Globe) 0918-873-4673 (Smart) 02-88044673 (PLDT) 2919 (toll-free for Globe and TM).

Sa National Center for Mental Health Crisis Hotline makontak sa; 0917-899-8727 ug sa 0917-899-USAP / 989-8727 / 989-USAP.