Dili pa moretiro si Nonito “Filipino Flash” Donaire taliwala sa brutal nga 2nd round TKO nga kapildihan niini batok kang Japanese Naoya “Monster” Inoue sa ilang world bantamweight unification rematch ning bag-uhay lang.
Mao kini ang gipabuhagay nga pagtuo ni kanhi world champion Carl Frampton sa interbyu sa Belfast Telegraph.
Nagkanayon si Frampton nga wala siya nagdahom nga nahitabo kini kang Donaire, kinsa iyang gika-video call pipila lang ka mga adlaw sa wala pa ang away.
“I was disappointed for Nonito, he was in good form when I chatted to him on a video call on Thursday morning,” matod pa ni Frampton sa iyang artikulo.
Gipasabot ni Frampton nga dili malikayan nga mahitabo kini sa usa ka boksidor hilabi na kon maantimano pagkaigo sa makusog nga kumo sama sa bitbit ni Inoue.
Nagtuo si Frampton nga bisan nag-edad na si Donaire og 39, aduna gihapon kini saktong ikabuga nga magpabangon kaniya gikan sa dakong kapildihan.
“You would think at 39 that it may be the end of his career, but I don’t think it is and get the sense he wants to carry on,” dugang ni Frampton.