Nabahin ang mga panahom sa mga dagkong opisyal sa kapulisan sa lalawigan sa Sugbo ug sa ilang rehiyonal nga buhatan kabahin sa giluwatan nga Executive Order (EO) 16 ni Gobernador Gwen Garcia diin naglatid nga optional na ang pagsul-ob og mask. Nalatid sa EO ni Garcia nga di na kinahanglan nga sul-ubon ang facemask kon anaa ka sa “well ventilated and open spaces” sa bisan asang dapit sa lalawigan ubos sa iyang hurisdiksyon.
Gisupak ni DILG Secretary Eduardo Año ning EO sa gobernador ug nimando sa kapulisan nga padayon nga mosita ug dakpon kadtong wa motuman sa minimum public health standards (MPHS) nga naglakip sa pagsul-ob og facemasks sa mga publikong lugar nga maoy gimando sa Inter-Agency Task Force (IATF) nga giaprobahan ni Presidente Rodrigo Duterte. Nanawagan si Garcia sa kapulisan nga di dakpon ang mga Sugboanon nga di magsul-ob og facemasks uban sa pagpahimangno nga ang lokal nga kagamhanan adunay operational control sa kapulisan.
Ang mga gihimo nga guidelines ug resolutions sa IATF di man ni balaod. Gani wa man kiniy gipataban nga multa o silot kon makasupak niini. Busa way angay nga ikabalaka kay bisan dakpon ka sa kapulisan kay wa nagsul-ob og mask, di man ni mamahimong balidong basehan aron pasakahan ka og kaso.
Niadtong niadtong Dominggo atol sa pagsaulog sa ika-124 ka tuig nga paghandom nato sa kagawasan, si Presidente Rodrigo Duterte uban si Lapu-Lapu City Mayor Junard “Ahong” Chan, adunay hulagway didto sa Luneta Park unya ang Presidente wa nagsul-ob og face mask samtang si Chan nagsul-ob og facemask. Si Gobernador Garcia gamit ang hulagway nilang Duterte ug Chan nihulagway niini nga mao ni ang iyang gipasabot nga “optional” sa pagsul-ob og facemask nga gi-share niya sa post sa social media.
Sa samang kalihokan didto sa Manila, adunay hulagway usab nga migawas nga mismo si Año wa usab nagsul-ob og facemask kuyog niya ang pipila ka mga opisyal nga tinudlo sa Presidente.
Di na ta maglalis niini kay sa tinud-anay anaa pa man gihapon ang Covid 19. Ang atong buhaton nga di gihapon ta mokompiyansa apan padayon magdisiplina sa kaugalingon. Kon lantaw nato gikinanghanglan nga magsul-ob ta og facemask sa dapit nga atong gisuroyan, buhaton nato kay wala may mawala nato kon ato nang himuon. (josephelvirtubilan@gmail.com)