Kapulisan sa tibuok rehiyon 7 nakasakmit og kapin sa P15 million nga balor sa illegal nga drugas atol sa usa ka adlaw nga dungan nga Anti-Criminality and Law Enforcement Operation (SACLEO).
Labing daghan nga nakakuha og illegal nga drugas mao ang Cebu City Police Office (CCPO) nga adunay kapin sa P10 million.
Ilang gisugdan ang operation sa Sabado sa kaadlawon, Hunyo 11, ug natapos sa Dominggo sa tungang gabii, Hunyo 12, 2022.
Sa datus sa Police Regional Office (PRO 7), sila nakatala og 172 ka operations nga niresulta sa pagkasikop sa 172 usab ka drug personalities ug pagkasakmit sa kapin duha ka kilo nga gituohang shabu.
Nakaimbargo usab sila og 257 ka mga armas nga walay lisensiya ug 18 ka mga tawo ang nangadakpan nga gipasakaan nag kaso ngadto sa korte.
Moabot usab sa 229 ka mga tawo ang nadakpan sa illegal gambling nga adunay P21,000 nga kwarta ang ilang nakuha gikan sa illegal nga sugal.
Ang labing daghan nga nadakpan ug nasakmit nga illegal nga drugas mao ang CCPO nga nakakuha og 1.6 kilos sa gituohang shabu nga adunay standard drug price (SDP) nga P10.8 million.
SITYO TARCOM
Gibutyag ni Police Lieutenant Colonel Janette Rafter, deputy city director for operations sa CCPO, nga ang kapin sa usa ka kilo nga gituohang shabu nakuha sa Mabolo police station sa usa ka drug personality sa sitio Tarcom, Barangay Busay, siyudad sa Sugbo.
Una nang giila ang maong dapit nga maoy tagoanan sa mga durugista sa siyudad sa Sugbo diin diha usab nitago ang nipusil patay kang Police Staff Sergeant Careby Clyde Alinsug, sakop sa Drug Enforcement Unit (DEU) sa Consolacion police station sa miaging semana.
Giangkon ni Rafter nga aduna na silay impormasiyon bisan wala pa nahitabo ang pagpusil patay kang Alinsug, problema gyud ang illegal nga drugas sa sitio Tarcom.
Dugang niya nga tungod sa subsub nga kampanya sa kapulisan sa siyudad sa Sugbo sa illegal nga drugas, ang mga inilang drug personality namalhin nag lugar diin didto sila namaligya.
Kini sama sa mga silingang siyudad ug kalungsuran sa lalawigan sa Sugbo.
Tungod niini, hugot ang pakig-alayon nila sa ilang counterpart sa mga silingang siyudad ug lungsod aron madakpan ang maong mga personalidad ug mahunong na ang pagkuyanap sa illegal nga drugas.
“Per information nato nga makuha sa atong intelligence operatives that drugs are really scattering na sa mga dili na gyud sa sentro siya,” matod ni Rafter.
Si Brigadier General Roque Eduardo Vega, hepe sa kapulisan sa Central Visayas, nipasalig nga bisan sa padayon nga giatubang nga pandemic, ang PRO 7 dili mohunong sa ilang kampanya batok sa kriminalidad.