Positibo si 3rd district Provincial Board Member Atty. John Ismael Borgonia nga mapasar isip ordinansa sa probinsya sa Sugbo ang paghimong optional sa pagsul-ob og facemask sa bukas ug well-ventilated areas sa lalawigan sa sunod nga sesiyon.
Si Borgonia namahayag nga kompleto ug andam na ang mga dokumento ingon man ang ordinansahon aron ipasar sa Hunta Probinsiyal sa Hunyo 20, 2022.
Gikatakda unta ang pagpasar sa ordinansahon sa Hunyo 13, 2022 apan wala nahinayon ang session tungod wala ma-quorum.
Sa 18 ka mga miyembro sa Hunta Probinsiyal, ang ningtambong mao sila si Bokal Raul Bacaltos (unang distrito), Edsel Galeos (ika-duhang distrito), Thadeo Jovito Ouano (ika-unom nga distrito), Christopher Baricuatro (ika-pitong distrito), Kerrie Keane Shimura (ika-upat nga distrito), Yolanda Daan (unang distrito), ug ang pangu sa Philippine Councilors League Cebu Province nga si Caroline Bacaltos.
Hinuon, nagtuo si Borgonia nga sa niining paagi mas mahatagan og ngipon ang giluwatang lagda ni Cebu Governor Gwendolyn Garcia sa optional nga pagsul-ob og facemask taliwa sa padayong pagminos sa mga kaso sa coronavirus disease 2019 (Covid-19).
“With that naa tay local ordinance nga magamit or ordinance aron dili na dakpon ang atong constituents o ang mga tawo kay wala na ma’y kabasehan ang mga police or law enforcers sa pagdakop,” matod ni Borgonia.
Subay sa ordinansahon nga gipanday, gitugotan nga optional lang nga sul-obon ang facemask sa mga lugar nga well-ventilated ug open areas.
Wala kini nag-limit sa mga Sugboanon lang nga namuyo sa probinsya apan lakip na usab kadtong mga gustong mobisita sa lalawigan.
Apan giklaro sa maong ordinansahon nga gikinahanglan gihapon ang pagsul-ob og facemask sa mga lugar nga crowded o daghang mga tawo.
Ang dunay mga sakit o simtomas sama sa sip-on, ubo, hilanat ug uban pa gikinahanglan gihapon magsul-ob og facemask aron dili makatakod.
Gipasabot ni Borgonia nga bisan pa sa pag supak sa Department of the Interior and Local Government (DILG) sa Executive Order No. 16 ni Garcia, mopadayon siya sa pagduso sa ordinansa aron mapanalipdan ang mga Sugboanon sa pagpanakop sa kapulisan ilabi na kon anaa kini sa lugar nga gitugot.
“Modakop sila unsa may ilang basehan? Karon nga wala ta nisunod wala may ngipon nga mapa enforce ang mandatory facemask sa open space ug well-ventilated space,” dugang niya.
SHOW CAUSE
Samtang si DILG Undersecretary Epimaco Densing, sa interbyu sa CNN Philippines, niingon nga makighinabi siya sa gobernador o ba kaha sa mga representante niini aron mahimo ang pipila ka mga kausaban sa giluwatang EO aron mahiuyon sa mando ni Presidente Rodrigo Duterte.
Nalakip sa gusto niyang ipausab mao ang pagpatuman sa mandatory nga pag sul-ob og facemask sa mga lugar nga crowded o daghang tawo.
“We will have to ask our officials in the region to talk to the governor to make some adjustments in the executive order. I believe there’s a good intent in the executive order by Gov. Gwen, but more importantly we should most probably look into the details... it should be aligned with what is pronounced by the President,” matod ni Densing sa interbyu.
Kon dili matuman ang mga kausaban, giingong maisyuhan og show cause order ang gobernador gumikan sa pagsupak sa polisiya sa Inter-Agency Task Force (IATF).
Bisan pa niini, hugot ang Probinsya sa pagpatuman sa maong lagda.
Asoy ni Borgonia nga samtang wala pa napasar ang ordinansa magpabiling tumanon sa lalawigan ang mando ni Garcia alang sa probinsya sa Sugbo.
Ang gobernador, sa iyang bahin, una na nga nisupak sa pagdakop sa mga Sugboanon nga wala nagsul-ob og facemask gumikan kay giingong anti-poor kini.
Hinungdan nga nigahin og minilyon nga facemask ang Kagamhanan sa Probinsya sa Sugbo aron maoy ihatag sa mga Sugboanon nga way ikapalit og facemask aron makapanagang sa Covid-19.