Baynte tres ka mga indibiduwal ug mga institusiyon ang nakadawat og recognition sa Cebu City Government alang sa mga serbisyo nga ilang gihatag sa Siyudad sa pagpaningkamot ug pag-uswag taliwala sa pandemiya.
Ang outgoing city councilors, mga buhatan sa City Hall, mga lider sa simbahan, ug mga negosiyante apil sa awardees nga nakadawat sa limelight atol sa 124th Independence Day Awards Night and Ball niadtong Dominggo, Hunyo 12, 2022, sa Waterfront Hotel and Casino, Cebu City.
Sa iyang pakigpulong, si Mayor Michael Rama niingon, “we have accomplished because we are around, we not I. Us not only you but all of us. For when we work together, progress will not be elusive, progress will just come before your face.”
Lakip sa awardees mao sila si outgoing Councilors Lea Japson, Eugenio Gabuya, Jr., David Tumulak, Alvin Dizon, ug Prisca Niña Mabatid.
Giila usab si incumbent Councilor Jocelyn Pesquera sa iyang paningkamot sa pagpasiugda sa industriya sa turismo sa dakbayan sa panahon sa kataas sa pandemya.
Giila usab sa dakbayan ang mga empleyado sa City Hall nga sila si Guillermo Viola, Julius Angel, Roberto Varquez, ug kanhi Department of the Interior and Local Government-Cebu City Director Ian Kenneth Lucero.
Giila usab ang Local School Board ug ang City Environmental Sanitation Enforcement Team sa lainlaing mga programa ug aktibidad nga nakatampo sa produktibo sa kagamhanan sa dakbayan.
Giila usab ang mga establisemento ug organisasiyon gikan sa pribadong sektor sa tabang nga ilang gihatag atol sa bagyong Odette (Rai) niadtong Disyembre 2021 ug pagsuporta sa programa sa pagbakuna sa siyudad.
Kini mao ang Cebu Contractors Association, Shopwise, Iconique Mall, All-terrain Medical Relief Organization, Archdiocese of Cebu, ug Engr. Wilhelm Go.
Mga atleta ug artista nga naghatag og garbo sa siyudad pinaagi sa pagdaog sa internasyonal nga kompetisyon.
Usa na niini ang singer nga si Maybelle Padillo, kinsa nahatagan og award sa iyang kontribusyon sa musika.
Ang mga atleta sa sayaw nga sports nga sila si Wilbert Aunzo, Pearl Marie Cañeda, Michael Angelo Marquez, Stephanie Sabalo De Leon, Sean Aranar, Ana Nualla, Mark Gayon, ug Mary Renigen giila tungod sa pagdala og medalya atol sa 31st Southeast Asian Games sa Vietnam.
Gitapos ang kagabhion pinaagi sa “Baile de Cebu”.