Menor de edad nga maoy spotter sa pagpamusil patay sa Barangay Sambag 2, Siyudad sa Sugbo niadtong Sabado sa gabii, na-rescue ug nahimong yawe sa Abellana police station sa pagsulbad sa krimen.
Nasuta nga ang menor maoy nigiya sa mga gun-for-hire kinsa ang pusilon ug asa.
Nasuta sa imbestigasiyon nga panimawos ang motibo sa pagpatay ug kabanay ra sa biktima ang gitumbok nga mastermind.
Matod ni Police Captain Jefferson Sinfuego, deputy chief sa Abellana Police Station, ang maong menor maoy nipadala sa impormasiyon kon asa na si Nicolas Laurente nga maoy ilang pusilon.
Nasuta nga ang menor de edad kabanay ra usab ni Laurente ug niangkon matod pa nga gisugo ra usab siya sa iyang uyoan.
Si Laurente, taga sitio Kawayan, Lower Ponce, Barangay Capitol Site, dakbayan sa Sugbo gipusil sa duha ka wala mailhing lalaki sa sitio Kawayan, Barangay Sambag 2.
Si Laurente uban sa iyang mga higala nag-inom alas 10:25 sa gabii sa Hunyo 11, 2022 sa usa ka tindahan nga gipanag-iya ni Agnes Albania.
“Ang nangyari is merong spotter na kamag anak rin nila naaresto natin, nasa kustodiya natin. Nakita natin sa cellphone, conversation,” matod ni Sinfuego.
Naa na silay persons of interest diin ang usa giila lang sa alyas nga wala lang una nganli samtang nagpadayon pa ang imbestigasiyon.
Dugang ni Sinfuego nga ang duha ka gunman gi-hire nga pusilon si Laurente bugti sa suhol ug ang mastermind naa sa sulod sa Cebu City Jail nga kabanay ra usab sa sa biktima.
“Namatay yung father nitong tatay sa Kalunasan. Pinagbibintangan yung uyuan [victim] nya na taga Surigao. Ngayon, ang taga Surigao [victim] pumunta sa Cebu para linisin yung pangalan na hindi siya yung pumatay sa tatay,” dugang ni Sinfuego.
SULBAD NA?
Samtang gikonsiderar na usab sa kapulisan nga sulbad ang pagpamusil niadtong Biyernes, Hunyo 10, sa alas 9:30 sa gabii sa sitio Bohol Village, Barangay Duljo Fatima, Dakbayan sa Sugbo.