“O Talasuyu ning Ginung manampat karing panamdam,
malunus ko pu kanaku king panaung ini.
Iko pu ing talapangabus ding sablang pakasaldak;
nung ala kayu, alang metung man.
Agyang ati ku mu king arapan yu,
Ding sala ku mangabating la ngan.
Nukarin ya makatagmung antitang ganaka ing ninu man?
Agyang kabud mung tagkil karing danum ning nwan a Gangga
Ninu man mikabus na ya, agyang ya ing pekamababang-dili king ketawan;
Dapot agyang kabud na ka mu apagumasdan, ing kapante bunga akakwa na naman.
Antita ing kekang katangyan.
Ing ninu mang makarapat sala karing Nwan nang Bitis Ginung Hari,
Malyari yang mipatawaran nung igale na la ding Banal a Lagyu.
Dapot nung mikasala ya keka, alang pangakabus para kaya.
King pusu mu, parati yang paynawa ing Ginung Govinda.
Yang sasabi i Ginung Govinda, at ngana,
“Aku ing mabye upaya ding Kanakung Talasuyu.”
Pagnasan kung karing balang beytan ku kanakung akwa
ing alikabuk karing nwan mung bitis.
Nganang Ginung Narottama,
“Pakisabing mayap, O Talasuyung Ginung manampat karing Panamdam,
magi ka sanang maganaka kanaku.”
~ “Ei Baro Karuna Koro”, by Narottama dasa Th'akura
***
“Megi kung sari katula kapamilatan ning mpanayuku ku karing kekang nwan a bitis.
Ing kelang-ligaya dinayu na, at ala nang nanu mang kapigaganakan.
Manakit kung tula karing sablang dane.
Ding adwa mung nwan a bitis ilang simpanan ning alang-anggang yumu
nung nu ing ninu man malyaring bumye ligtas king lumbe at takut.
Menakit kung kapayapan karin ngeni at binili ku na
ing takut king makalabwad a pamiiral.
Miyampang kung kasuywan king kekang pibale-bale
at e ku pagdulapan magpasasa karing bunga ning kasuywang ita.
Nung e kanakung pakikwanan ing nanu mang makapamatula keka,
Lubusang makatagulaling karing nwan mung bitis.
Ding kagulwan a atagmwan ku king pamanyuyu keka
magi lang sangkan ning maragul a ligaya,
Uling king makatagulaling a kasuywan keka milupa lang dakilang pibandyan.
Agnan dang lalagsakan ing dusa ning kelangbelwan.
Lubusan ku nang akalingwan ing sablang milabas a amlat
kapamilatan ning daramdaman king dakilang tula king kanakung isip.
Bitasa kung keka na ku at taganang kanaku na ka.
Nanu pa ing ing kaylangan king aliwang pibandyan?
I Bhaktivinoda, susungab ya king laut ning saring ligaya,
Tatagulaling na ing sablang pamigunyat king kasuywan keka
at tutuknang king kekang pibale-bale mu
agpang karing kekang sablang kapagnasan.”
~“Nivedana Tuwa Pade”, by Bhaktivinode Thakur
“ O kagalang-galang a Talasuyu ning Ginu,
O dayat malat ning pakalulu, malunus ka sana king kekang ipus,
Ipagkalub mu sana kanaku ing salilung ding nwan mung bitis
At padalisayan mu ku. Kakalawat ku karing kekang nwan a bitis.
Turwnan mu kung ampatan la ring anam a matikding panamdam;
Itud mo sana ding anam kung kamalyan,
ipagkalub mo sana kanaku ding anam a katangyan,
At iyampang mo sana kanaku ding anam a kauryan ding banal a pamisamak.
E ku apadulap ing sikanan bang ibalaus kung magdili-dili
ing panglaganas a pamigale karing Banal a Lagyu nang Hari.
Pagkalaman mu ku sana kapamilatan ning pamamye mu kanaku
agyang kapatak mung kapanaligan bang akwa la
ring dakilang pibandyan ding Banal a Lagyu nang Krishna.
Keka Ya i Krishna; atin kang upaya bang ipagkalub me Ya kanaku.
Kabud ku mu mamulandit king kagulutan mu at gugulasyo, "Krishna! Krishna!”
*Ding anam a matikding panamdam makaparikil la karing amanu, ing isip, ing mwa, ing dila, ing dungus at ding dake kasaryan.
Ding anam a kamalyan ila ring labis a pamamangan, pamilakap karing makalabwad a bage, kelang kegiwan bang talukyan la ring makatud a tuntunan, pamipakabsi karing panamdam, alang ulagang pamipagsalitang alang kapupuntalan,
at e dalise gawi.
Ding anam a mayap a katangyan ila pin ding kagagaran king pamagsane
king makatagulaling a kasuywan, matibe kapanaligan king makatagulaling
a kasuywan, masikan a kapagnasang dasan ing kasuywan king lugud,
mapakinabang a pilubluban king kasuywan, pamangilag karing e talasuyu,
at pamipaulaga karing talasuyu ning Ginu.
Ding anam a paralan ning pamakisamak ila pin ding pamamunta
karing pamitipun-tipun ding talasuyu, ing pamanagkat karing talasuyu
king kekayung pibale-bale, bang pisabyan at pakirandaman la ring paksa
king kasuywan, ing pamamangan dakilang pamangan a pidaun king Ginu,
at ing pamagdaun king pamangan a midaun king Ginu karing talasuyu na.”
~ “O Hei Vaishnava Thakura”, by Srila Bhaktivinoda Thakura
***
Ating Guru o Spiritual Master karing balang tune kasalpantayanan, anti king nung makananung ing Ginung YesuKristo yang Guru tamu king tune kasalpantayang Kristyanu at ding minuna kayang i Abraham, Moyses, at aliwa pang tinaluki. Karing Muslim ating “Imam”; karing Udyus o Jews ating “Rabbi” at karing Buddhists atin lang Dalai Lama. King pamaglako nang Ginung YesuKristo at kayari ning parasan na keti king yatu, atin mu namang menalili a tinuki king dalpak na anting Guru.
Ing metung a Guru e ya magi na kabud Guru uling ating menubud kaya ba’yang maging guru; e uling sikat ya; e uling matas ya pegaralan; e uling dakal ya pibandyan o dakal ya talatuki. I Ginung Yesukristo ala ya kareta−kasikatan, dakal a pibandyan, matas a pegaralan, o dakal a bilang ding talatuki.
Ing maulagang atin ya ing tune Guru ya pin ing dalise nang lugud king Ibpang Kakataskatasan. At iti tuturu na’t darake karing sabla, e mu karing Kristyanu, o Muslim, Jews, Buddhists nung e pati na karing Gentiles, karing paganu at pati na karing alang kapanwalan o pamangilala king Dyos. Bayu ita, pepaylalam ya naman king patuntun ning metung a tune Guru a mika-guru mu naman. Nung ala yang Guru, e ya tune guru.
Iting makatuki ya ing tuturu na kekatamu ngan, “Luguran Ya ing Dyos king mabilug mung pusu, king mabilug mung isip, at king mabilug mung pangatau.” Kadwa at kambe niti ya pin ing “Luguran la ring aliwa anti ning pamaglugud mu king sarili mu.”
Nung aliwa deta ring tuturu ning pakilalang guru, e ya tune guru ita.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king "garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.