Sugod niadtong Lunes, Hunyo 13, 2022, bag-o na ang hepe sa kapulisan sa probinsya sa Sugbo human hulipi sa katungdanan si Police Colonel Engelbert Soriano.
Ang Camp Crame nipagawas og kamandoan sa paghulip kang Soriano ug gidestino siya sa Personnel Holding Admin Unit sa ulohang buhatan sa Philippine National Police (PNP) pinitsahan og Hunyo 12, 2022.
Nihulip kaniya ang kasamtangan nga pangulo sa Logistics Division sa Police Regional Office 7 nga si Police Colonel Elmer Lim.
Sa gipagawas nga press release sa Camp Crame, ilang gipahibawo ang pagparelibo kang Soriano nunot sa provision sa PNP organization memorandum diin ang provincial directors, city directors o kaha chief of police nga nagranggo og police colonel kinahanglan mangulo lang sulod sa usa ka tuig.
Kini alang sa career advancement niini ug paghatag og higayon sa ubang mga police official nga kwalipikado nga mga third level police commission officers nga molingkod sa maong mga posisyon.
Si Soriano kapin na sa usa ka tuig nga nahimong hepe sa kapulisan sa probinsya sa Sugbo human gitudlo ni Cebu Governor Gwendolyn Garcia nga mangu sa kapulisan sa lalawigan sa Sugbo.
“For info sir/mam, PCol. Engelbert Soriano was relieved as Provincial Director, Cebu PPO effective June 12, 2022. His relief is pursuant to the provisions of PNP Memorandum Circular 2022-002, which states that Provincial Director, City Director or COP of NCRPO shall be held by a PCOL for a continuous period of one year, extendible to a maximum of three months upon approval by the CPNP. This is for career advancement and to give greater opportunity to other qualified Third Level PCOs. PCOL Soriano served as PD, CCPO for more than one year,” matod sa Camp Crame.
Si Lim sakop sa Philippine National Police Academy class of 1998 ug dugay nga nadestino sa CPPO una siya gidestino sa Police Regional Office 7.
KONTROBERSIYAL
Nahimong kontrobersiyal ang pamahayag ni Soriano sa dihang mipagawas og Executive Order No. 16 si Garcia nga wala na magmandato sa mga lumolupyo sa probinsya pagsul-ob og facemask kon naa sa ventilated ug abli nga lugar.
Nisukwahi kini sa mensahe sa Department of the Interior and Local Government (DILG) diin sila sa gobernador pulos ubos sa maong ahensiya, nga dili pa mahimo nga tugotan nga motangtang sa facemask ang katawhan sa mga publikong lugar tungod kay peligro pa sa tinakdanay sa Covid-19.
Gibadlong usab siya ni Police Brigadier General Roque Eduardo Vega, hepe sa Police Regional Office 7, nga kinahanglan nga ang sundon mao ang Inter-Agency Task Force (IATF).
Tungod sa nagkasumpaki nga mga pamahayag, nibahad ang officer-in-charge, PNP Chief Police Lieutenant General Vicente Danao Jr., ngadto sa mga personnel nga sundon ang kamandoan sa DILG ug Camp Crame kay kon dili, labing maayo nga mo resign sa serbisyo.
Nitataw usab ang DILG nga ang pagsul-ob og facemask usa ka balaud tungod sa executive order ni Presidente Rodrigo Duterte kalabot niini.