Kapulisan sa siyudad sa Sugbo miklaro nga padayon sila sa pagpahinumdom sa katawhan nga mogamit kanunay sa facemask ilabi na kon mogawas sa balay apan wala na sila manakop gawas sa pagbadlong human nimando si Mayor Michael Rama nga dili na manakop sa wa magsul-ob.
Matod ni Police Lieutenant Colonel Janette Rafter, deputy director for operations sa Cebu City Police Office (CCPO), nga ang ilang mga personnel nga gipangdestino sa pagpatuman sa Oplan Bulabog ug Oplan Recorida gibutang na ngadto sa anti-criminality campaign sa kapulisan.
Apan wala kini nagpasabot nga ila nang talikdan ang pagpatuman sa minimum health protocol sanglit naa pa man gihapon ang virus nga naghulga sa panglawas sa publiko kon mokompiyansa sa ilang kaugalingon.
Ang Oplan Bulabog ug Oplan Recorida maoy best practice sa CCPO nga nakatabang sa pagkunhod sa kaso sa Covid-19 sa dihang misulbong kini sa milabay ug sayo ning tuiga.
Dugang ni Rafter nga kon mag-roving ang mga pulis ug adunay maatlan nga nagtapok sa usa ka lugar nga wala na masunod ang health protocol, ila kining badlungon ug pasabton nga kanunay sul-obon ang facemask ug tumanon ang social distancing tungod kay peligro kini sa tinakdanay sa virus.
Nabantayan hinuon nila nga kadaghanan sa mga tawo sa dakbayan sa Sugbo misunod pa gihapon sa minimum health standard ug makita nila nga nagsul-ob kini sa face mask ilabi na sa mga publikong lugar sanglit naanad na sila niini.
Gipahibawo usab sa CCPO nga nakatutok usab sila sa ilang mga programa sama sa anti-criminality ug drugas nga kampanya ug wala nila kini lugaki sukad pa kaniadto.