MIUBOS ang ihap sa mga aktibo nga mga kaso sa coronavirus disease (Covid-19) sa Dakbayan sa Cagayan de Oro.

Anaa na sa walo ang akitbo nga mga kaso sa dakbayan ug nakatala usab ang syudad og duha ra ka mga bag-ong kaso.

Ang duha ka mga bag-ong kaso pulos mga returning overseas Filipinos (ROFs). Kini sila gilangkuban sa usa ka nabakunahan nga 44-anyos nga lalaki residente sa Barangay Carmen ug gikan sa USA, ug usa ka nabakunahan nga 38-anyos nga lalaki residente sa Barangay Bugo ug gikan sa Egypt.

Miabot sa 25,876 ang kinatibuk-ang ihap sa mga kaso sa Covid-19 sa dakbayan.

Ang Cagayan de Oro adunay walo ka mga aktibo nga mga kaso, una niini na-admit sa Northern Mindanao Medical Center, upat ang mga outpatient, ug tulo ang mga ROFs/LSIs.

Nakatala usab og tulo ka mga coronavirus-positive nga mga kaso nga karon naka-recover human nagnegatibo ang resulta sa ilang repeat swab test.

Anaa na karon sa 24,927 ang ihap sa mga nakarekober nga mga kaso sa dakbayan.

Ang ihap sa mga namatay sa Covid-19 sa syudad anaa na sa 941.