Gikiha na sa kapulisan sa probinsya sa Sugbo ang 18 anyos nga babaye nga uyab-uyab ni Reynaldo Ydil alyas Tatskie ug habal-habal driver nga gigamit nga getaway vehicle.
Matod ni Lieutenant Colonel Mark Gifter Sucalit, deputy director for operation sa Cebu Police Provincial Office, nga ila gyud nga nasuta sa imbestigasyon nga apil ang duha sa ilegal nga kalihukan ni Ydil.
Giingong sakop sila sa usa ka dakong drug syndicate nga naglihok sa Sugbo nga maka-dispose og binulto nga ilegal nga drugas.
Daku ang posibilidad nga gikan sa kaulohan ang supply sa ilegal nga drugas nga gipadagan ni Ydil sa Sugbo.
Si Ydil maoy suspek sa pagpusil patay kang Police Staff Sergeant Careby-Clyde Alinsug, sakop sa Drug Enforcement Unit (DEU) sa Consolacion Police Station nga nag-surveillance uban sa usa ka asset, kinsa kritikal usab nga gidala sa tambalanan, niadtong Hunyo 5 sa gabii.
Napatay usab siya sa hiniusang follow-up operation sa kapulisan ug Mandaue City Police Office sa Lunes sa buntag, Hunyo 6, sa sitio Tarcom, Barangay Busay, dakbayan sa Sugbo. (AYB)