MATI CITY, Davao Oriental - Human sa duha ka tuig nga paghunong sa mga phyisical activities ug kalihokan sama sa beauty pageant tungod sa hulga sa pandemyang Covid-19, di ikalimod ang kalipay nga nasinati sa mga taga Mati diin hinay-hinay nang nabalik ang pisikal nga mga selebrasyon.
Kabahin sa selebrasyon sa ika-19 nga Pujada Bay Festival ug ika-15 nga Citihood sa dakbayan sa Mati mao ang Queen of Pujada 2022.
Gilangkuban sa 19 ka mga kandidata ang nangapil sa maong kompetisyon diin adunay managlahaing adbokasiya sama sa pagprotekta ug pagkonserba sa Pujada Bay nga ginganlang "One of the Most Beautiful Bays in the World".
Gikan sa 19 ka mga kandidata nga nagtigiay sa managlahing outfits sama sa swimsuit, long gown ug uban pa, walo na lamang niini ang napili aron maapil sa unang set sa question and answer portion.
Human sa walo ka mga kandidata nga nagtigiay sa unang set sa question and answer portion, tulo na lamang sa ilaha ang pilion aron mosulod sa final question and answer.
Nakuha ni candidate number 10 Arci Comendador ang puwesto nga second runner-up ang special award nga Miss Rustic Coffee Lounge.
First runner-up si candidate number 18 Francine Dapitanon nga mipresentar sa Barangay Central diin aduna usab special and minor awards nga best in gown ug Miss trendsis.
Nasungkit sa garbo sa Barangay Mayo ang titulong pinakaunang Queen of Pujada Bay 2022 nga nakuha ni candidate number 8 Jayrell Piastro Morato diin mihakot usab og awards nga best in swimsuit, Miss close up smile, Ruffa g choice award, ug Dra Evana Gluta Station award.
Epektibo ug empowering usab ang pagdumala nila Alton June Torres ug Janikris Canoy isip president ug vice president sa Lesbian, Gay, Bisexual, Transgender, Queer (LGBTQ) Mati nga organisasyon diin gibayaw nila ang partisipasyon sa matag usa diin miresulta sa nindot nga dagan sa mismong event.
Tiunay nga enggrande ug bongga ang selebrasyon sa Pujada Bay Festival ug Citihood Day diin malampusong nahan-ay sa Mati Tourism Events Office Team ang maong kalihokan nga gipangunahan ni Mati Tourism Events Office Head Juvy Tanio.
Luyo ning tanan, malipayon si Mayor Michelle Nakpil Rabat diin nakita niini nga nalingaw ug nalipay ang katawhan sa Mati. Nagpamatuod usab kini nga suportado sa kasamtangang administrasyon ang LGBTQ community. (CIO MATI/ Cerlyn Cabanit/JPC)