Bag-ong hepe sa kapulisan sa probinsya sa Sugbo wala pa mo-report human hulipi sa katungdanan si Police Colonel Engelbert Soriano nga gibalhin sa Personnel Holding Admin Unit sa Camp Crame.
Sigun sa order sa Camp Crame pinitsahan niadtong Hunyo 12, 2022, gibalhin si Soriano sa PHAU sa Directorate for Personnel and Records Management isip floating status.
Matod ni Police Lieutenant Colonel Mark Gifter Sucalit, deputy director for operations sa Cebu Police Provincial Office (CPPO) nga sa pagkakaron wala pa sila masayod kon kinsa ang ilang sunod nga provincial director sanglit wala pa sila nakakita sa pormal nga kamandoan gikan sa ulohang buhatan.
Una nang nigawas ang pangalan ni Police Colonel Elmer Lim, kasamtangan nga hepe sa Logistics Division sa Police Regional Office 7 (PRO 7), apan wala kini nikompirmar sa tawag ug text sa mga sakop sa PNP Press Corps.
Sa pagkakaron, si Police Lieutenant Colonel Milbert Esguerra, deputy provincial director for administration, ang kasamtangang modumala sa kapulisan sa lalawigan.
Apan nipasalig si Sucalit nga wala ray problema ug dili ra makaapekto sa ilang mga programa ug kampanya batok sa kriminalidad ang sitwasyon nga wala pa hingpit nga mo lingkod ang ilang labaw.
“It will not affect since we are mandated to do our respective job even if we are still waiting sa umaabot nga provincial director,” matod ni Sucalit.
Dugang ni Sucalit nga kon unsa man ang mga programa ug mando nga ipatuman ang ilang ulohang buhatan, ila kining tumanon apan wala na kini modetalye pa kon molusad ba sila sa pagpanakop niadtong molapas sa health protocols sa kalungsuran sa probinsiya.
Gipasabot hinuon niini nga ang tanan ilang ipaagi sa proseso kon nasunod ba sa mga tawo ang lagda o aduna bay nalapas sa guidelines sa nasudnong kagamhanan ug sa lokalidad.