Barugan sa Kagamhanan sa Probinsya sa Sugbo ang lagda sa optional nga paggamit og facemask sa mga lugar nga bukas ug well-ventilated.
Kini bisan sa pamahayag ni Department of the Interior and Local Government (DILG) Secretary Año nga walay legal basis ug considered defective ang ordinansa nga “Rationalizing the use of facemask in the Province of Cebu” nga gipasar sa Hunta Probinsyal sa Hunyo 14, 2022.
Si Atty. Rory Jon Sepulveda, Capitol legal consultant, niingon nga ang giluwatang Executive Order No. 16 ni Cebu Governor Gwendolyn Garcia dunay igong basehanan nga ipatuman pinaagi sa bag-o lang gipasar nga ordinansa.
“We will stand strong behind that...to repeat, our Provincial Ordinance and the EO are anchored on the Local Government Code which was passed pursuant to a Constitutional mandate,” matod ni Sepulveda sa Hunyo 15, 2022.
“The guidelines is not a law... Even the highest office (in government) is beneath the law,” saysay ni Sepulveda.
Gihimug-atan ni Sepulveda nga sama sa pagpakita og basehan sa Probinsya, mas maayo og mopakita usab si Año og basehan sa iyang giluwatang pamahayag kay duna silay basehanan nga mao ang Local Government Code.
“Ang among tubag Republic Act No. 7160 kon wa siya masayod ana...balihon ko, naa man mi legal basis ang amo lang sad pangutana...Unsa man sab ang basis sa statement nga superior ang iyang guidelines to a provincial ordinance and an executive order? That’s our legal basis, ang RA 7160,” dugang niya.
IPATUMAN
Si Cebu Governor Gwendolyn Garcia mipadayag usab nga karon nga nahimo nang balaod ang optional nga paggamit og facemask sa mga lugar nga bukas ug well-ventilated, gikinahanglan niya kining ipatuman.
“All of our acts - my EO or Provincial Ordinance are anchored upon the law. These are not our own personal judgments, our own personal orders, feelings or positions since when we were elected and took our oath, we took an oath to uphold laws,” matod ni Garcia sa Hunyo 15, 2022 nga press conference.
Ang lagda ni Garcia, una nang nagpasabot nga magpabilin ang mando sa pagsul-ob og facemask sa mga lugar nga sirado ug airconditioned.
Apan mahimong optional, pasabot pwede magsul-ob, mahimo usab nga dili magsul-ob sa lugar nga bukas ug well-ventilated, agad sa gusto sa hingtungdan.
Ang mando una nang wala uyoni sa DILG tungod kay maghatag kini og “undue injury and confusion” sa nasudnong polisiya sa pag sul-ob og facemask.
LEGAL NGA LAKANG
Matod ni Año nga konsultahon niya ang iyang legal team alang sa lakang sa legal nga aksyon batok kang Garcia ug sa iyang kamanduan nga nagtangtang sa mandatory nga pagsul-ob og facemask sa probinsiya.
“The EO (Executive Order) 151 of PRRD (President Rodrigo Roa Duterte) and IATF (Inter Agency Task Force) Guidelines shall prevail over the EO of [Governor] Garcia and the ordinance passed by the Cebu Provincial Council,” matod niya sa usa ka Viber message ngadto sa SunStar sa gabii sa Hunyo 14, 2022.
“The Ordinance has no legal basis and considered defective because it is not only consistent but also contradicts the national policies embodied in EO 151, EO 168 and IATF Guidelines,” dugang niya. (Dugang taho ni TPM sa SunStar Philippines)