Rabacal: SOCE nga dili masusi

Hapit na tanang mga kandidato sa miaging piniliay ang nakasumiter sa ilang Statement of Contributions and Expenditures (SOCE) apan adunay dili buot nga masayran ang detalye niini.

Ang ilang gusto nga ang Commission on Elections (Comelec) lamang ang makakita ug masayud kon pila ang ilang nadawat nga amot ug pila usab ang ilang nagasto sa kampanya sa milabay nga eleksiyon. Unsa may ilang gitago?

Ang tumong ug tuyo niining pag-file sa SOCE aron nga masayran kon wala ba sila nakalapas sa gimbut-an sa Comelec nga angay gastuhon sa usa ka kandidato ug sa political party niini.

Mas maayo kini pagkahashas kon ipublikar kini aron masayud ang publiko sa kon wala ba namakak ang usa ka pulitiko.

Ang nakalibug nako mao kining gipahibawo sa election officer sa Cebu City nga dili niya ipahibawo ang gi-file nga SOCE sa mga mikandidato sa milabay nga piniliay kon dili kuno mosugot niini ang kandidato mismo.

Unsa may ilang gikahadlokan? Nga adunay mga tawo nga mokuwestiyon sa ilang ideklarar?

Daghan bayang nagduda nga adunay mga kandidato nga naghimohimo lamang og listahan sa nagasto bisan kon dili tinuod.

Kay kinsa guy motuo nga mogasto lamang ang kandidato ug ang iyang partido og P15 matag botante.

Labing maayo nga masayran sa katawhan ang tanang SOCE aron mabunggo kining mga bakakon.

Nahimo nang balaud ang kontrobersiyal nga executive order ni Gobernador Gwendolyn Garcia nga maghimong optional ang pagsul-ob og facemask sa bukas ug well-ventilated areas sa lalawigan sa Sugbo.

Napasar ang ordinansa ni 3rd district Provincial Board Member John Ismael Borgonia sa usa ka special session nga gihimo karong bag-o.

Wala akoy nakita nga diperensiya sa EO ni Gob. Garcia ug sa kasugoan sa IATF nga mandatory gayud ang pagpasul-ob niini bisan sa gawas nga dapit samtang gihatagan sa gobernador og igong kabuot ug katungod ang katawhan sa lalawigan sa pagpanalipod sa ilang kaugalingon batok sa Covid-19.

Sugdan na sa dili madugay ang Lapu-Lapu Expressway (LLEX) nga maoy magdugtong sa Cebu-Cordova Link Expressway (CCLEX) ngadto sa Mactan-Cebu International Airport (MCIA).

Lain kini nga LGU-PPP expressway. Mao kini ang maghingpit sa tumong ug tuyo sa CCLEX nga himuong agianan gikan sa mainland Cebu ngadto sa MCIA nga dili mahasul sa trapik inig-abut sa Lapu-Lapu City.

Apan wala kini matagad dayon kaniadto kay wala man naapil sa negosasiyon ang kanhi administrasyon sa maong siyudad.

Ako nagduda nga kon dili mahinayon kining maong proyekto nga dili usab mapahimuslan sa hingpit ang ikatulong taytayan. (msr1144@yahoo.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph