Kapulisan sa siyudad sa Sugbo nipatawag og consultative meeting sa mga ahensiya sa gobyerno aron mapatunhay ang mga pamaagi sa pagduso og mga rekisitos labot sa mga kaso nga giatubang sa mga children in conflict with the law (CICL) aron dili sila ma technical nga usa sa hinungdan nganong daghan ang nanga dismiss nga mga kaso.
Nisalmot sa meeting ang kadagkoan sa Cebu City Medical Center CCMC, Bureau of Jail Management and Penology (BJMP) sa dakbayan sa Sugbo, Cebu City Prosecutor’s Office ug Operation Second Chance.
Gibutyag ni Police Lieutenant Colonel Maria Theresa Macatangay, hepe sa Investigation and Detective Management Branch (IDMB) sa Cebu City Police Office (CCPO), nga nakasugat silag problema sa pag commit sa mga CICL sa Operation Second Chance tungod sa kadaghan sa requirements nga kuhaon hangtod nga maabtan na sila sa reglementary period.
Gipasabot niya nga kon adunay usa ka menor de edad nga nakahimog krimen ug kon ma-rescue, kinahanglan pa nga ipaubos sa medical examination sa CCMC sama sa X-ray ug uban pa.
Ang resulta niini maoy ilang iduso sa Cebu City Prosecutors Office nga maoy basehan usab sa piskal sa paghatag sa commitment order paingun sa Operation Second Chance.
Apan ang mahitabo, malangay tungod sa kadugay usab nga mogawas sa resulta sa medical exams hinungdan nga maabtan na sila sa reglamentary period nga angay na buhian ang ilang na rescue nga menor de edad.
“We want to streamline our process. We want all agencies to be able to see eye to eye sa ani nga mga rekisitos. Naa sad tay mga rekisitos nga gi-request nato nga tangtangon na lang or pagamyan nalang, because at the end of the day, ang atoang ganahan ra gyud mahitabo ma perform nato kon unsay gi require sa balaod,” matod ni Macatangay.
Si City Prosecutor Liceria Rabillas sa Cebu City Prosecutors Office niangkon nga kon malangay pag release ang CCMC sa medical certificate, mapugos sila sa pag dismiss sa kaso sa menor de edad.
Iyang gipasabot pag-ayo sa kadagkoan sa tambalanan kon unsa ka mahinungdanon ang medical certificate sa usa ka dinakpan nga angay ikonsiderar nila.
Aduna silay gihimo nga sulosyon nga mao ang pag adjust sa oras sa reglamentary period aron mahatagan og higayon ang kapulisan nga makakuha sa mga rekesitos nga maduso sa gitakdang oras nga gihatag nga tagal kanila.
“So, kon dili sila maka submit sa medical certificate as a requirement, wala mi laing choice but we have to dismiss the case, so sayang sad kaayo,” matod ni Rabillas.
Si Cebu City Councilor Philip Zafra, chairman sa peace and order sa Konseho sa dakbayan sa Sugbo, nagkanayon nga mihimo na og pamaagi ang kadagkoan sa CCMC nga mapadali ang pag isyu sa medical certificate ug resulta sa x-ray sa mga CICL.
Usa sa mga gitinguha nila mao ang pag-umol og fast lane o kaha department sa tambalanan nga naa na didto tanang rekisitos sa mga dinakpan nga matawag nga one stop shop aron dili na malangay pa ang pagproseso sa ilang mga papeles nga gikinahanglan sa korte.
Nagpasalamat ang kapulisan sa siyudad nga sa maong consultative meeting nahatagan og sulosyon ang mga problema nga ilang giatubang sa mga kaso nga gikalambigitan sa mga menor de edad.