Nitudlo si President-elect Ferdinand “Bongbong” Marcos Jr. sa kanhi senador ug beteranong manlalaban nga si Juan Ponce Enrile isip presidential legal counsel, matod sa iyang press secretary Trixie Cruz-Angeles sa Huwebes, Hunyo 17, 2022.
Matod ni Angeles, si Marcos Jr. nitudlo usab kang outgoing justice secretary Menardo Guevarra isip solicitor general ug kanhi Armed Forces of the Philippines (AFP) chief of staff ug retired general Jose Faustino Jr. isip senior undersecretary ug officer-in-charge sa Department of National Defense (DND).
Dason ni Angeles, ang tulo pulos ningdawat sa tanyag kanila.
Si Enrile nagsilbi nga Minister of National Defense gikan sa Enero 1972 ngadto sa Nobiyembre 1986, ubos ni kanhi Presidente Ferdinand Marcos, Sr. Nahimo usab nga senador gikan sa1987 ngadto sa1992, 1995 ngadto sa 2001 ug 2004 ngadto sa 2016.
Samtang si Guevarra, gitudlo ni Presidente Rodrigo Duterte isip Justice secretary sa 2018. Nakasilbi usab siya isip commissioner sa Philippine Competition Commission sa 2016 ubos nahi anhing Presidente Benigno Aquino III.
Matod ni Faustino, nakasilbi siya isip 63rd acting commanding general sa Philippine Army ug natudlo nga AFP chief of staff sa 2021.
Sa sayo pa, si Marcos Jr. nitudlo kang retired University of the Philippines political science Professor Clarita Carlos isip National Security Adviser; Abono party-list representative Conrado Estrella III isip hepe sa Department of Agrarian Reform (DAR); Vice President elect Sara Duterte-Carpio isip secretary of education; kanhi Metro Manila Development Authority chairman Benhur Abalos Jr. isip secretary of the Interior and local government; ug Cavite seventh District Representative Jesus Crispin “Boying” Remulla isip justice secretary.
Gihinganlan usab niya si Susan Ople isip pangulo sa Department of Migrant Workers; Bienvenido Laguesma isip secretary sa labor department; Benjamin Diokno isip finance chief; Fred Pascual isip secretary sa trade and industry; Manuel Bonoan isip secretary sa Department of Public Works and Highways; Liloan Cebu Mayor Frasco isip tourism head; ug Erwin Tulfo isip secretary sa social welfare and development department.
Si Manlalaban Ivan John Uy isip pangulo sa Department of Information and Communications Technology; Amenah Pangandangan sa Department of Budget and Management; Felipe Medalla isip governor sa Bangko Sentral ng Pilipinas; Arsenio Balisacan isip National Economic and Development Authority; ug Maria Zenaida Angping isip pangulo sa Presidential Management Staff.
Gitudlo usab niya si Attorney Vic Rodriguez isip executive secretary ug Davao del Norte Second District Representative Antonio Lagdameo Jr. isip special assistant to the President. (TPM sa SunStar Philippines)
