Vallena: Pedestrianization

Dugay na kaayong gituki ang pedestrianization sa dan Colon, ang labing karaan nga karsada sa Pilipinas. Apan hangtod karon, way seryusong diskusyon parte niini.

Hinuon, sa sayong bahin sa pamunoan ni Mayor Michael Rama sa 2010, dunay mga higayon nga gipasirhan ang tipik sa karsada aron pedestrians ug nagbiseklita lang maoy makaagi. Nakamugna ni og gamay nga kahuot sa trapiko sa sikbit nga mga dan. Di ni ikahibung tungod kay di man naandan ang pagsirado sa dan Colon.

Mabuhat ba gud ni? Nganong di man? Kana kon pursigido ang namunoan sa Siyudad ug makombinser ang mga negusiyante sa pagbuhat niini.

Sa dihang niadto ko og Guangzhou, China niadtong Agusto sa 2017, ang tipik sa central business district gi-exclusive for pedestrians lang. Apan grabe ang kadaghan sa mga tawo. Ang mga dapit nga naay mga sakyanan nangagi, mahulagway nako nga hapit gilangaw.

Ang dapit nga way mga sakyanan nagdasok ang mga tawo to the point nga di na hapit matagakan og dagum.

Naglinya ang mga tindahan nga sikat sa West sama sa Giordano, Uniqlo, H and M ug uban pa. Kay nag sale man niadtong higayuna, nakapamalit ko og pipila ka mga senina. Kon tag P1K kapin dinhi, didto tag P200-P300 lang. Original na.

SERYUSUHON

Wa ko nasayod kon ang business community ba sa dan Colon ang supak o ang kagamhanan mismo tapulan mohimo og pagtuon ug mopatuman niini. Apan nasayod ko nga si Rama bukas kaayo sa mga ideya nga makapaanindot sa siyudad sa Sugbo. Maminaw man ni ang atoang mayor kay wa ni siyay mentalidad nga siya ray nakahibawo. Consensus leadership man ang iyang estilo. Hinaut nga ang urban planners mohisgot og balik ngadto sa mayor sa pedestrianization sa Colon, not necessarily the whole stretch.

Di lang kanang tuhiktuhik nga estorya, kon di seryusong pagplano sa pedestrianization sa dan Colon. Di dali-dalion.

Natural duna gyud nay mga pagsupak, apan di gyud kalikayan nang mga ingon ana kay naa may mga tawo nga mahadlok sa mga kausaban.

Obserbahi lang kon dunay night market sa Colon, diin ang mga sakyanan di makasud, dunay daghang mga tawo.

TURISMO

Ako sang naoserbahan nga duol sa dan Colon, sa sikbit nga mga karsada, dunay old Chinese structures. Wa ko masayod kon ang Siyudad nagmarka ba ani nga mga balay nga mahimong protektahan ug di mahilabtan isip Chinese heritage sites. Judging sa dagway ani nga structures, daan na gyud ni.

Kon ma pedestrianize ang Colon, mahimo nang malakip sa heritage tours ang sikbit nga mga dan diin naa kining Chinese structures. Mahimong maglakaw o magbiseklita ang mga turista ug guides. Depende sa gusto sa mga turista.

Daghan ang mahimo sa kagamhanan sa dan Colon kon turismo ug pagpalambo og maayo sa dapit.

Hinuon, ang mga negusyo sa dan Colon dugay ra untang mamatay, apan maayo ang pag-handle sa Cebu City aron mabuhi og balik ug nagmingaw na untang dapit.

Dako ang kahigayunan nga makatabang pa ang pedestrianization sa dan Colon.