Nasurpresa ko dihang nakadungog sa balita nga gimandoan ni acting Market Administrator Weldell Cenas sa miaging Hunyo 9, 2022 ang mga ambulant vendor sa Carbon nga motambong og tigum aron mag-eleksyon sa ilang mga opisyal.
Laing mando sa miaging Hunyo 15, 2022, nga pinirmahan ni City Market Administrator Raquel Arce, nagkanayon nga buot ni Mayor Mike Rama nga mag-voluntary transfer sa pwesto ang pipila ka mga stallholders ug vendors ngadto sa interim market sulod sa 24 ka oras.
Murag nayabag na man kining mga opisyal sa Cebu City Hall. Mamandoan ba diay sa kagamhanan ang mga pribadong grupo nga mag-eleksyon? Ug duna bay strict compliance anang voluntary transfer?
Tuod man, walay eleksyon nga nahitabo. Kay wala man gyuy gahum ang Cebu City Hall nga momando og eleksyon sa mga ambulant vendor.
Panglingla man sab kining giingon nga voluntary transfer. Gusto ni Mayor Mike Rama, kay gigamit man ang iyang ngalan ni Arce sa iyang sinulat nga mando, nga boluntaryo nga mobalhin ang mga namaligyaay sa Carbon market.
Tuyo ni Rama ug ni Arce nga masubmarino ang kaso nga gisang-at sa Carbon Alliance aron malusaw ang Joint Venture Agreement (JVA) tali sa Cebu City Hall ug Megawide.
Si Rama mismo, kadtong buhi pa si anhing mayor Edgardo Labella, nga daghan og sayop ang maong JVA. Gani, nasuta ni Rama ug kini naay record diha sa sesyon sa Konseho, nga wala matiwas og basa sa mga Konsehal nga namirma niini.
Apan karong mayor na si Rama, nausab ang iyang baruganan ug gusto na niyang ipakanaog ang JVA samtang naa pa sa korte ang kaso sa mga vendor.
Ambot sab kining huwes nga dugay man kaayo makaaksyon. Niabot pa sa punto nga bisan ang mga sakop sa media nituo na nga na-dismiss ang maong kaso.
Alang sa kasayuran sa tanan, ang maong kaso naabot na mediation stage. Angay untang tukion kini sa mga sakop sa media kay dako kini og impluwensiya sa mga lakang karon ni Mayor Rama.
Ug kon atong tukion, nayabag ang mga lakang sa Cebu City Hall tungod sa Megawide. Ingna ko nga nasayop.
Paksyon
Angay sab natong sabton nga siguruon karon ni Mayor Rama nga ang iyang paksyon diha sa Cebu City Hall ang mopatigbabaw ug dili ang klarong wala diha kaniya sa panahon sa kampanya.
Nakahibawo na man kita nga naay mga giingong sakop sa Barug nga didto suporta kang kanhi konsehal Dave Tumulak. Naa say nisuporta kang Isko Moreno ug wala kang incoming president Bongbong Marcos.
Dayon, naay mga dagkong opisyal ni outgoing President Rodrigo Duterte nga wala moklaro og suporta kang Marcos ug gikontrahan ni Bise Presidente Sara Duterte.
Importante karon kang Mayor Rama nga ma-consolidate ang iyang kampo samtang sayo pa. Sa miaging administrasyon ni Labella, klaro man nga naay mga opisyal ni Duterte nga wala mobilib kaniya. Forced to good na lang kay si Rama man ang nahimong mayor dihang namatay si Labella.
Lame duck
Wala makahulat si Gob. Gwen Garcia nga mohawa na si President Duterte ug mo-take over si Presidente Marcos. Iyang giduso dayon ang iyang kontrobersyal nga balaod sa paglugway sa paggamit sa mask diha sa Lalawigan sa Sugbo.
Igo ra gyud tawon nakapataktak sa hepe sa kapulisan sa lalawigan ang DILG. Pila ra may pagpabalik niini inig tungtong na ni Presidente Marcos. (DM nako @anol_cebu)