Labing unang trade fair sa dakbayan sa Talisay gisalmotan sa 100 porsiyento sa mga magpapatigayon sa siyudad human sa awhag sa pangu sa Talisay City Chamber of Commerce and Industry nga si Cyril Velasco.
Matud ni Velasco nga miabot sa 72 ka mga stalls ang nakalumbay atubangan sa Talisay City Hall nga namaligya og klase-klase nga mga tinda.
Ang trade fair molungtad og tulo ka adlaw nga gisugdan niadtong gabii sa Biyernes, Hunyo 17, hangtud na karong adlawa, Dominggo, Hunyo I9, 2022.
“I’m proud to say nga very occupied ang amoang slots sa atong trade fair karon,” matod ni Velasco.
Sa mga nisalmot sa tulo ka adlaw nga trade fair, gidawat usab nila kadtong mga lumad nga taga Talisay, 30 porsiyento sa nangapil gikan gikan sa mga kasikbit nga kalungsuran sa siyudad.
Dako usab ang pasalamat ni Velasco ngadto sa local government unit sa Talisay City tungod kay gihimo nga libre ang ilang pagmontar sa tulo ka adlaw nga patigayon atubangan sa city hall.
Nakita ni Velasco nga sa dakbayan sa Talisay naghinayhinay na sa pagbalik ang naandan, labina sa negusiyo sa pagkaon nga maoy nag-una.
Busa sa 72 ka stalls, 35 niini nagbaligya og mga pagkaon.
Ang maong trade fair sa milabay nga tuig pa unta pagahimuon apan tungod sa hulga sa pandemiya, wa nadayon.
“Atong tema diri sa atong Talisay trade fair is ‘The way back to normal.’ Kita mga negosyante atong ip kita nga we need to be back to normal. Wev’e been in the normal state already in the past few months,” dugang ni Velasco.
Awhag niini ngadto sa mga Talisaynon nga mobisita sa trade fair kay gihulagway ni Velasco nga lahi kini nga kalihukan.
“This is a unique trade fair because if you notice in the activities, naa tay cosplay event. Naa tay banda kada gabii, naa pud tay sumba naa gyud tay pakulo.
We want this to have a mall concept. The chamber will bring in the crowd kon naa sila sa lugar, naa silay kapalitan dry goods, pagkaon ma shopping man, mokaon man sila,”dugang ni Velasco.