Tungod kay duna nay ubang mga tunghaan nga nagpahigayon og face-to-face nga klase, ang dakbayan sa Talisay dili usab magpauwahi.
Si Talisay City Mayor Gerald Anthony “Samsam” Gullas sa pakighinabi sa mga sakop sa media sa Biyernes, Hunyo 17,2022, nibutyag nga iyang gisuportahan ang pagbukas sa atubangay nga mga klase.
Matod pa ni Gullas nga makigtagbo siya sa school’s division superintendent tungod kay ang gipasar sa siyudad nga Special Education Fund (SEF) kadto pa mang wala pa gikuso-kuso ang siyudad sa bagyong Odette.
Dugang ni Gullas nga ang Department og Education (DepEd) Talisay City Division dunay nagkadaiyang priority projects sa wala pa ang Odette.
Apan ang mayor niingon ngadto nila nga kinahanglan i-amendar pa sa Local School Board ang SEF budget aron mohaom sa rehabilitasyon nga himuon sa mga tunghaan nga nangadaut human sa pag-igo sa bagyong Odette sa Central Visayas.
Tungod niini, nag laraw ang mayor nga makigtagbo sa board sa unang semana sa Hulyo sa iyang paglingkod sa iyang ikaduhang termino pagka mayor.
“The Government will repair all of them using the SEF budget. Mao na akong gihangyo ang school’s division superintendent nga ipatawag ang tanang mga principal. Mangutana unsay problema nila. Amend their previous request nga pre-Odette to a post-Odette rehabilitation request,” sigon ni Gullas.
Sa labing uwahing kalamboan, pipila sa mga nakompleto na og repair sa Engineering Department sa Talisay City Government mao ang atop sa Lawaan 1 Elementary School ingon man ang roofing ug installation sa canopy sa Barangay Lawaan 3 ug Lawaan 3 National High School.
PULIS NANGANDAM
Habig usab sa kapulisan sa dakbayan sa Talisay, gipaabot ni Police Lieutenant Colonel Randy Caballes, hepe, nga duna na sila’y close coordination sa school heads ug nihimo na sab og inspection sa mga tunghaan ang Talisay City Police.
“Ang atoa is more security. Atong i-secure lalo na magtapok na ang mga bata, mga ginikanan mag-abot sa opening mag-deploy ta og mga personnel for security unya ni-close coordination sad nato ang CT-TODA ilabi na katong mga eskwelahan along the highway ma-secure nato ang traffic flow sad”, matod ni Caballes.