Gikan sa ubos sa .500 nga standing sa National Basketball Assiciation (NBA) sa sayong bahin sa Enero, walay nagtuo nga moabot sa NBA Finals ang Boston Celtics human sila napakyas pagsakmit sa 2022 NBA championship trophy.
Ang ilang paglaom nga maangkon ang ika-18 nga kampyonato sa ilang prangkisa natunaw human sila gipukan sa Golden State Warriors 2-4 didto mismo sa TD Garden.
Apan ang young core sa Celtics masaligon nga ilang makab-ot ang dugay nang kampeyonato nga ilang gipangandoy ug ilang gamiton ang kasakit nga ilang nasinati sa niaging NBA Finals ug bisan sa ilang pagkapukan, na-establisar sa Boston ang ilang dominasyon sa Eastern Conference.
“The biggest message was learn from this, grow from it, take this experience and see there is another level to get to,” matod pa ni head coach Ime Udoka. “Just don’t come back the same as players, coaching staff. Let this fuel you throughout the offseason into next year,” dugang ni Udoka.
Ang Celtics anaa sa transition dihang nibanos si Udoka isip coach sa Celtics human kini gibakante dihang nibiya si Brad Stevens, kinsa nidumala sulod sa walo ka seasons diin iyang nabitbit ang team ngadto sa Eastern Conference Finals nga gipangulohan sa ilang All Star duo nga si Jayson Tatum ug Jaylen Brown apan pakyas sila pagsulod sa NBA Finals.
Sa paghulip ni Udoka, nahimo niya kini sulod lang sa usa ka season uban sa pag-develop sa mga beterano nga silang Marcus Smart ug Al Horford.
Nangani ang Celtics sa ilang kahago ug ang 18-23 nga record, nahimong 51-31 paghuman sa regular season ug husto nga mahimutang ang Boston sa second seed diin ilang gi-sweep ang Brooklyn Nets sa first round.
Gisundan sa back-to-back seven game series batok sa NBA champ Milwaukee Bucks ug top seed nga Miami Heat.
Unang nakaposte og 2-1 nga lead ang Celtics batok sa Warriors apan gisagunsonan sila sa nisunod nga tulo ka duwa nga maoy naghatod sa GSW sa ilang ika-7 nga kampyonato.
Ang Boston adunay record nga 1-7 sa playoffs kon sila adunay turnover nga lapas sa 16 diin sa upat nila ka pilde sa NBA Finals, nilapas ang ilang turnover sa maong numero.
Nagkaproblema pa ang ilang star nga si Tatum sanglit igo lang siya nga nag-average og 22 points kun 37% field goal sanglit 44 ra ang iyang napasulod gikan sa 120 niya ka mga itsa ug igo lang niiskor og 12 puntos sa game 6 kun 5 of 13 sa iyang tira atol sa game 6.
“It’s hard. It’s hard getting to this point. It’s even harder getting over it, the hump, and win it. It’s been a long journey, a long process. That’s what I took from it: it’s tough. You got to take it up another level to do what we want to do,” paghulagway ni Tatum.
Si Udoka aduna nay kasinatian sanglit gawas nga nakaabot na siya sa NBA Finals, siya ang assistant ni coach Gregg Popovich dihang ang San Antonio gipilde sa Miami Heat niadtong 2013 NBA Finals ug pagkasunod tuig, napanimaslam sa Spurs ang Heat ug maoy niangkon sa 2014 NBA Championship trophy.
“We improved in a lot of areas but fell short of our ultimate goal. Some guys didn’t play their best. That’s going to motivate guys throughout the season. The message is everybody come back better. Let’s not be satisfied. It’s not guaranteed you’re going to be here,” dugang ni Udoka. (AP)