Nagpanikad na ang Mayor Mike Rama-Cebu City Baseball Team sa ilang pagsalmot sa Ormoc Open Baseball Tournament 2022 nga sugdan karong Hunyo 24 didto sa Ormoc City.

Ang maong team gilangkuban og mga beterano nga Sugbuanong baseball players nga nakaduwa na sa national team o PH Blu Boys.

Matod ni team manager John Tugot nga mapasalamaton sila kang Mayor Michael Rama sa gihatag nga suporta sa team ug sa paghatag og higayon sa pagpakita sa ilang abilidad sa natad sa baseball.

“Dili lang jud ta mag-una, but kani atong team naa sad ni ikabuga. Paninguhaon namo nga mga makuha ang pinakataas nga place,” batbat ni Tugot sa SunStar Superbalita.

Dugang niya nga ang maong liga giisip nila nga stepping stone aron makakuha og exposure ang baseball dinhi sa dakbayan.

Sigon niya nga plano nila nga magtudlo og batted sports clinic alang sa grassroots players human ang ilang duwa didto sa Ormoc.

Ang Mike Rama-Cebu City Baseball team gipangulohan ni team owner Mayor Rama, team manager Tugot, head coach Dionisio Bacarisas ug assistant coach Sendo Sanchez.

Lakip sa players sila Alexis Rollon, Bryle Sario, Nelson Gabayan, Kent Louise Bacarisas, Oliver Gimena, Ryan Alec Godofredo, Marlon Cabrera, Jackson Genolaga, Vander Tabares, Ramil Guillermo, Rufford Guillermo, Hasmin Omandac, Isaac Bacarisas, Joseph Orillana, Raymond Nerosa, Luis Bacarisas, Roldan Bacarisas ug Clarence Caasalan.