Mao kini ang debate karon sa social media human midaog si Stephen Curry sa iyang ikaupat nga titulo ubos sa Golden State Warriors.

Adunay analysts ug players nga miingon nga ang greatest three-point shooter deserving na nga malakip sa Top 5 National Basketball Association (NBA) greats.

Si Curry midaog sa tanan niyang titulo ubos lamang sa usa ka team—ang Warriors. Una siyang nahimong kampiyon sa 2015. Nasundan kini sa 2017, 2018 ug ang karong presko lang nga titulo.

Lakip sa hataas nga resume ni Curry ang 4 NBA titles, 2 MVP awards, 1 Finals MVP, 8 times All NBA, 2x scoring champion, all-time 3-point leader, franchise leaders sa puntos, assists ug three-points, ug unang player nga nakabuhat og 500 three-points sa playoffs.

Usa sa player nga miingon nga lakip si Curry sa Top 5 mao mismo ang ilang karibal sa Western Conference, si Ja Morant sa Memphis Grizzlies.

Mi-post si Morant sa Twitter sa accomplishment ni Curry nga may caption: Top 5 All-Time.

Managlahi ang reaksiyon sa mga tawo ug adunay miingon nga ang achievement ni Curry wa pa makaparis sa nabuhat nila ni Michael Jordan, Kobe Bryant, Wilt Chamberlain, Bill Russell, Kareem Abdul Jabbar, Magic Johnson ug Lebron James.

Anaay netizen nga miingon si Curry lakip na sa Top 10 apan wala pa kini masulod sa Top 5.

Matod pud sa usa ka netizen nga wa pa makasulod si Curry sa Top 10.

Ang kolumnista nga si Bill Reiter nagtuo nga si Curry lakip na gyud sa Top 5.

Ang 34-anyos nga si Curry na-draft sa Warriors isip 7th overall pick niadtong 2009. Wa gyud mobalhin si Curry og team, bisan pa sa panahon nga naa sa ubos ang Warriors.

Gilauman nga mobuak pa og mga rekord si Curry kay taas paman kini og playing years sa NBA.