Gibabagan sa San Miguel ang tumong nga three-peat sa TNT Tropang Giga human nila kini gilupig sa Leg 5 sa PBA 3x3 Third Conference kagahapon didto sa Robinsons Place sa Antipolo.

Ang kombinasyon ni Jeff Manday ug Ken Bono maoy nagdominar sa duwa ug mialsa sa Beermen ngadto sa 21-12 nga kadaogan.

Naninguha ang TNT nga masakmit ang three-peat human sila maghari sa Legs 3 ug 4. Apan adunay laing plano ang SMB. Gibulsa sa SMB ang titulo lakip na ang P100,000 nga cash purse.

Ang Beermen mao ang ikatulo nga team nga midaog og titulo karon nga conference.

Sa laing bahin, ang Cavitex milupig sa Terrafirma, 21-14, aron sakmiton ang ikatulo nga pwesto. Mao kini ang pinakataas nga nakuha sa Cavitex sukad sa ilang runner-up finish sa Leg 2.

Nakabulsa og P30,000 ang Cavitex alang sa ilang third place finish.